MERKEZÊ XEBERAN - Têgêrayîşê Cinîyan ê Kurdan ê Almanya (YJK-E) seba rayraşîyayîşê hemverê qanûnê polîsî, qedexeyê PKKyî û nijadperestî yo ke do 1ê Kanûne de bêro organîzekerdene veng da.

 

Rayraşîyayîş do bi slogana “Wa waştişê azadîye nêro qedexekerdene – Hemverê qanûnê polîsî, qedexeyê PKKyî û nijadperestîye de mucadeleyo hempar” bêro viraştene.

 

Goreyê YJK-Eyî “Do no seba şarê Kurdî, hêzanê enternasyonalan, demokratan û femînîstan bibo platformêk ke waştişanê xo yê demokrasî û azadîye biyarê ziwan.”

 

YJK-Eyî vat: “Rixmê qedexeyê 25 serran zî PKK Almanya de nêeşkayo bêro marjînalkerdene. Eksê nê de projeyê Konfederalîzmo Demokratîk yê PKKyî û Rayberîya ci Almanya de hetê xeylî dormeyan ra paştî girewta.”

 

Goreyê YJK-Eyî Almanya bi dewamkerdişê qedexeyê PKKyî yê 25 serrî, qanûnê polîsî yo ke fikirêna hîna bikero hîra û bi berzbîyayîşê hetê neteweperwer-raştgêrî îdîaya welatêkê demokratîkî bîyayîşî ra dûrî kewena, bi lez ver bi standardanê Tirkîye şina.

 

Eşkerayîye de nê vajîyayî: “Ma sey YJK-E sere de veng danê heme cinî û şarê xo û veng danê femînîst û hêzanê demokratîkan ke tewrê rayraşîyayîşê ma yê Berlînî bibê. Ma Almanya zî dawet kenê ke fek polîtîkayanê xo yê krîmînalîzekerdişê şarê Kurdî ra vera bido.”