AMED - Serekê Baroya Amedî Tahîr Elçî serra 3ine ya kişîyayîşê xo de dimayê rayraşîyayîşêk verê Minareya Çarlinge ya ke Sûr de ya ame vîrardene.

 

Cinîya ci Turkan Elçî, temsîlkarê Yewîya Baroyanê Tirkîye yê Dîlok, Îzmîr û Enqereyî, parlamenterê HDPyî yê Amedî Remzîye Tosun, Selçûk Mizrakli, Musa Farisogullari û xeylî avûkatî tewrê vîrardişî bîyî.

 

Rayraşîyayîş de ke verê Edlîye ra dest pêkerd pankartê “Kiştişo ke dewlete nêeşko rosin bikero çinyo, kiştişo ke dewlete nêkena rosin esto” ame kiriştene. Polîsan dormeyê Minaraya Çarlinge, ke Elçî ûca amebi kiştene, girewt binê ablûqa. Gama kîtle resaye cayê qewimîyayîşî qeydê vengê Elçîyî yê eşkerayîya êya peyêne dîya goşdarîkerdene.

 

Serekê Baroya Amedî Cîhan Aydinî vat: “Înan o heşt estûnan de kerd manşet, kulturê lînçî de yewbînan dir kewtî musabeqe, la Elçîyî yew game zî pey ser nêeşte.”  Serekê Baro Cîhanî vatişê selahîyetdaranê îqtîdarî yê dimayê kiştişî yê sey ‘Ma do nê kiştişî roşin bikerê’ ard vîrî û wina vat: “3 serrî ravêrtî, la înan bincewêk zî rayîr nêgirewt. Tayê dîmenê kamera raşte ra ameyî wedartene. Sozî reyna nêgîrîyayî, kiştoxî mîyanê ma de yê. Ma do na dewa sey înadê Tahîr Elçîyî teqîb bikerê, ci bigêrê û kerdoxan vejê meydan.”

 

Cîhanî dewamê qiseykerdişê xo de nê vatî: “Dewlete herinda ke kerdoxanê kiştişê Tahîr Elçîyî û kiştişanê ke kerdoxê înan meçhul ê vejo raşte, vernîya çalakîya heqdare ya Mayê Şemeyî gêna. Bi nê kerdişanê xo ramojnena ke nîyetê ci çi yo û kamcîn kîşte de ya. Ma reyna anê ziwan ke ma kîşta Mayê Şemeyî de yê û dej û waştişanê înan pare kenê.”