ENQERE - Parlamentera Partîya Demokratîke ya Şaran (HDP) Ayşe Acar Başarane qala qerarê MHMEye kerde û dîyar kerde ke no qerarêko fînak o û alternatîfê Tirkîye ‘ez qerar pê nêana’ çin o û va: “MHMEye qerarê xo yê derheqê Hemserekê Pêroyî yê kehen Selahattîn Demîrtaşî de hewldayîşê tasfîyekerdişê HDPyî tesdîq kena. Îmtihanêk gird bi huqûqê Tirkîye yeno kerdiş.”

 

Hemserekê Pêroyî yê HDPyî yo kehen Selahattîn Demîrtaş ke 4ê teşrîna peyêna 2016î ra nata yo ke zîndan de yo. Çend rojî verê cû Mehkemeya Heqanê Merdiman ya Ewropa (MHME) derheqê Selahattîn Demîrtaşî de qerar dabî û dîyar kerdbî ke ganî Demîrtaş serbest bêro veradayene. MHMEye dabî zanayene ke tewqîfkerdişê Demîrtaşî polîtîk o. Dima ra Erdoganî îzehetê xo de vatbi ‘no qerar ma eleqeder nêkeno’.

 

Parlamentera Partîya Demokratîke ya Şaran (HDP) ya Êlihî û endama Komîsyonê Huqûqî ya HDPyî Ayşe Acar Başarane qala qerarê MHMEye kerde û dîyar kerde ke no qerarêko fînak o û alternatîfê Tirkîye ‘ez qerar pê nêana’ çin o.

 

'Ganî Tirkîye qerar pê bîyara'

 

Ayşeye destpêkê qiseykerdişê xo de bale ante qerarê MHMEye ser û wina va: “Taybet serê 18. Nuqtaya Pêkerdişê Heqê Merdimîye ya Ewropa (PMME) de vindetî. Mehneya ci oyo ke hewldayîşê tesfîyekerdişê HDPyî tesdîq kenî û vanê; no qeraro ke derheqê parlamenteran û hemşaredaran de ameyo dayîş huqûqî nîyo û polîtîk o. Qerarê MHMEye hetê tarîxê Tirkîye de qerarêko muhîm o. Îzehetê Erdoganî û yê Wezîrê Edaletî ra dîyaro ke qerarê MHMEye înan eleqedar nêkeno. Labelê roja ke qerar ameyo dayîş ra nata îqtîdar seba pêardişê qerarî ti çîyêk nêkerdo. Ganî qerar vîrê Tirkîye bêro kerdiş. Tirkîye endamê Konseyê Ewropa ya û Pêkerdişê Heqê Merdiman yê Ewropa îmze kerda. Ganî Tirkîye qerar pê bîyara.”

 

'Avûkatî talebê tehlîyekerdişî kerdî'

 

Ayşeya ke qala qerarê serbest veradayîşê Demîrtaşî kerde dewamê qiseykerdişê xo de wina va: “Tewqfkerdişê sîyasetmedaranê HDPyî polîtîk o. Avûkatê Selahattîn Demîrtaşî talebê tehlîyekerdişî kerdî. HDP paweyê netîceyê qerarî yo û do rojanê verînan de vindetişê mehkemaya herêmî zî bêro zanayîş.”

 

'Sewbîna alternatîfê Tirkîye çin o'

 

Ayşeye tewr peynî qala pêardiş û pênêardişê qerarê MHMEye kerde û wina qedênaye: “No qerarêko fînak o û alternatîfê Tirkîye ke ‘ez qerar pê nêana’ çin o. Ma do hetê huqûqî û polîtîk de seba pêameyîşê qerarî her tewir hewldayîşan bikerî. Îmtihanêk gird bi huqûqê Tirkîye yeno kerdiş. MHMEye de derheqê sewbîna parlementeranê ma de zî dosya estî. ganî MHMEye derheqê nê dosyayan de zî bi hawayo lez qerar bida.”