WAN - Wendekarê cinî yê YYU de wanenê, dîyar kerdî ke nêeşkenê vejîyê baxçeyê ci, odeyê ke 2 kes eşkenê bimanê, 6 kes manenê. Mifteyê berê înan çin o, wezîfedarê wargehî bi hawayêke kêfî yenê odayan kontrol kenê.

 

Îhlalkerdişê unîversîteyan ke vera wendekaran yenê kerdene, wargehan de zî yenê kerdene. Wendekarê ke seba problemê ekonomî mecbur manenê wargehan de bimanê, xeylê probleman dir yenê rî bi rî. Wargeho ke ganî lazimîyê asayîşî û starbîyayîşî wendekaran bi ca bîyaro, şertê xo ra dûrî yo.

 

Caardişê ke wendekarê cinî yê wargehê girêdayê Unîversîteya Yuzuncu Yil ê Wanî de manenê yenê rî bi rî, persê 'Wargeh o ya zî zindan o' ano hişê merdimî. Wendekaran ra Hatîce Ozere wina va: "Wargeh de xeylê problem yenê cuyayîş. Reyan ma nêeşkenê dersê xo zî bixebityê."

 

'Werdê ci nînê werdiş'

 

Hatîceya ke werdê wargehî ra gerrekerdox a wina va: "Werdê ke ma wazenê nînê viraştiş. Çîyêke nêkenê mîyanê werdan. Ma wazenê ma bixo viraznê la nêverdêne ke ma çîyêke bikerê zere. Nêverdenê ma hewceyê xo yê taybet zî bigîrê zere."

 

Wargeh o ya zindan o?

 

Hatîceye da zanayîş ke destûr nîno dayîş ke vejîyê baxçeyê wargehî, çalakîyê spor zî nînê kerdene û wina va: "Dimayê kampusî dersê ma qedênê, ma mecbur manenê ke şêrê wargeh. Ma nêeşkenê vejîyê teberê wargehî. No semed ra ma zaf acis benê."

 

Wendekarêke bîne zî nêwaşt nameyê xo bida wina va: "Odayan de ganî 2 kes bimanê ma 6 kes manenê. Ma nêeşkenê dersan bixebityê. Nivînê ma rehet nîyê. Ma di embazî eynî nivînan reyan pare kenê. Mifteyê odayan çin o. Wezîfedar raste rast kewenê odayan û cigêrayîş kenê."