MÊRDÎN - Hemsereka HDPî ya Nisêbînî Samîye Demîre dîyar kerde ke înan dest bi amadekarîyê weçînayîşê mintiqa kerdê û do 31ê Adare de şarê Nisêbînî şaredarîya xo do reyna bigîrê. Samîyeye wina va: "Ma do şarî dir şaredarîya xo înan ra bigîrê. Ma do îradeyê xo teslîmê qayûman nêkerê.”

 

HDP seba weçînayîşê 31ê Adara 2019an Nisêbîn de dest bi amadekarîyan kerd. Hemsereka HDPî ya Nisêbînî Samîye Demîre derheqê amadekarîyan de şîrove kerde û arde ziwan ke do bêmabên bixebityê û bi şarî dir newe şaredarî bigîrê.

 

'Şar razî nîyo'

 

Samîye da zanayîş ke hemşaredara Nisêbînî Sara Kaya ke Êlulê 2016an de ameya tepiştiş, hema zî tepişnayîya û wina va: "Qayûm 3 serrî yo ameyo la tu xizmet şarî rê nêkerdo. Bi ameyîşê qayûman dir heme rayîrê ma xira bî. Heme sîyê peyerayîran ameyî wedartiş. Taxa ma nêameya asfaltkerdiş. Heme tax mîyanê herrî de ya. Ma şinê serdayîşê şarê Nisêbînî, qayûm ra razî nîyo. Tena waştişêke şarî esto. Wazenê ganî şaredarî newe ra bigîrê. Roja ke qayûm ameyo, şar nêwazeno şoro şaredarîyan. Şar bi 3 serrî yo bi rehetî nêeşkeno şêro şaredarîyan muracat bikero."

 

'Do şar şaredarî reyna bigîro'

 

Samîyeye arde ziwan ke startê weçînayîşan nika de dayî destpêkerdiş û wina va: "Nisêbîn de 6 taxî ameyî rijnayîş. Bi hezaran keyeyî ameyî rijnayîş. 3 serrî ser ra derbaz bi la hema heme rayîrî mîyanê herrî de yê. Pêwa heme waştişanê ma xebatêke nîna meşnayîş. Ma bawer ê ke ma do şaredarîyan reyna bigîrê. Ma do heta 31ê Adare bê mabên bixebityê."