ÎZMÎR - Endama PMyî ya HDPyî Berna Çelîke dîyar kerde ke ganî piştîdayîşo ke dîyeno çalakîya Leyla Guvene hîna hîra bibo û kaoso ke destpêkerdişê prosesî ra nata yeno cuyayîş, bi muzakereyan eşkeno bêro çareserkerediş.

 

Hemsereka Kongreya Komelê Demokratîke (KCD) û parlamentera HDPyî ya Colemêrgî Leyla Guvena ke seba protestokerdişê tecrîdê serê Rayberê Şarê Kurdî Abdullah Ocalanî 8ê teşrîna peyêne ra nata Zindanê Tîpa Eyî yê Amedî de grevê vêşanîye de ya. Çalakîya Leylaye rê her ke şona hîna zaf hîra bena. Derheqê babete de Endama PMyî ya Partîya Demokratîke ya Şaran (HDP) Berna Çelîke qisey kerde û vengê piştîdayîşê çalakîye kerde.

 

'Ganî wayîrê çalakîye bêro vejîyayîş'

 

Bernaya ke çalakîya Leylaye rê piştî waşte derheqê peynîkerdişê tecrîdê serê Rayberê Şarê Kurdî Abdullah Ocalanî û çareserkerdişê prosesê kaoso ke Tirkîye de yeno cuyayîş de qisey kerde û wina va: “Ganî heme rêxistinê demokratîk û komel wayîrê çalakîye bivejî. Tecrîdo ke Rayberê Şarê Kurdî Abdullah Ocalanî ser o yeno meşnayîş, esasê xo de serê heme şaranê Tirkîye de yeno meşnayîş. Qeraro ke derheqê Selahattîn Demîrtaş û sewbîna parlamenteran de ameyo girewtiş, esasê xo de seba padayîşê rayîrê sîyasetê demokratîke ameyo girewtiş. Eke rayîrê sîyasetê demokratîke akerde bibayêne do ewro heme parlamenter û hemşaredarê ma raşteyan de xebatanan bikerdêne.”

 

'Keso ke seba aştîye hewldayîşê pîlî dano Birêz Ocalan o'

 

Bernaye qiseykerdişê xo yê peyênan de arde ziwan ke şarê Rojhelato Mîyanênî çarçeweya paradîgmaya Abdullah Ocalanî de seba azadîya xo têkoşîn dano û domnaye: “No prosesê aştîye û muzakere ke mase yena qelibnayîş. Keso ke seba aştîye hewldayîşê pîlî dano Birêz Ocalan o. Birêz Leyla Guvene zî bi nê fehmî çalakî daye dest pêkerdiş. Seba prosesanê weşikan ganî ma destê xo bidî yewbînan.”