MERKEZÊ XEBERAN - Hepsîyê PKK û PAJKîyî seba şikitişê tecrîdê serê Rayberê Şarê Kurdî Abdullah Ocalanî 27ê Teşrîna peyêne de qasê 10 rojan kewenê grevê vêşanîye yê biagêrayîş û bêdemî.

 

Hepsîyê PKK û PAJKîyî yê ke zîndananê Tirkîye û Kurdistanî de yê seba wedartişê tecrîdê serê Rayberê Şarê Kurdî Abdullah Ocalanî roja awanbîyayîşê PKKyî 27ê Teşrîna peyêne de dest bi grevê vêşanîye yê biagêrayîş û bêdemî kenê. Eşkerayîya ke bi nameyê heme tepişteyanê PKK û PAJKîyan hetê Denîz Kayayî ra amî dayene de nê îfadeyan rê ca dîya: “Ma serragêrayîşê 41. yê partîya xo pîroz kenê, nê ganîbîyayîşê neweyî sere de ro Rayber Apoyî, heme hemrayan û şarê xo pîroz kenê û hemrayanê xo yê ke nê rayîrî de şehîd kewtê bi hurmet înan bi vîr anê.”

 

Denîzî dewam de vîrardene ke 20 serrî yo bi muameleyanê teberê merdimîye tecrîd yeno dewamkerdene û nê vajîyayî: “Rayberîya ma ya ke bi cehdanê serê hêzê merdimî de prosesê aşitî da destpêkerdene, hemverê na hemleya ê de faşîzmê TCyî bi hawayêkê topyekunî dişmenîya Kurdan viste dewre. Ma sey tepişteyê PKK û PAJKîyî reyna anê ziwan ke ma her şertî de kîşta rayberîya xo de yê. Ma sey hemrayê ke beyraqa xoverdayîşê zîndanî Mazlûman, Kemalan, Hayrîyan, Çaran û Sarayan ra girewta hemverê polîtîkayanê teberê merdimîye yê faşîzmî de xoverdayîşê xo yê birûmetî domnenê.”

 

 

Denîzî wina dewam kerd: “Rayberîya ma nefes û ruhê ma yê azadîye ya. Sebirê ma nêmendo ke ma hemverê nê tecrîdê teberê merdimîye de wina vinderê. Ma roja awanbîyayîşê PKKyî 27ê Teşrîna peyêne ra tepîya qasê 10 rojan dest bi grevê vêşanîye yê biagêrayîş û bêdemî kenê. Şikitişê tecrîdê hemverê Rayberîya ma waştişê ma yo tek o. wextêkê tewr kilmî de do na çalakîya ma halêkê cîyayî, radîkalî bigîro. Nê prosesî de ma veng danê heme demokrat, roşinvîr û kesanê ke xo ra vanê merdim ke na çalakîya ma dir eleqedar bê. Ma veng danê şarê xo yê Kurdistanî û Tirkîye ke dorê çalakîye de biresê pê. Heta ma ra eşkerayîyêk nêro na çalakî do dewam bikero. Ganî tepişteyê ma yê nêweş û kokimî na çalakîye ra muaf bêrê girewtene.”