DÊRSIM - Hemsereka HDPî ya Dêrsimî Ozlem Toprake dîyar kerde ke ewro vera şîdetê serdest yê camêrdan, temamê dinya têkoşîn yeno dayene û wina va: "Yê ke Îzlanda de yê vanê ‘karê têduşt, heqdestîyê têduşt', yê DYA û Ispanya kuçeyan leqnenê. Ma Şengal de yê, Rojawan de yê. Ma veng danê heme cinîyan ke 25ê Teşrîna Peyêne de waran de bê."

 

Cinîyê Tirkîya û Kurdistanî bi bername û çalakîyê xo waran de yê, 25ê Teşrîna Peyêne de seba pêvînayîşê pîl xo amade kenê. Hemsereka HDPî ya Dêrsimî Ozlem Toprake dîyar kerde ke têkoşînê ke cinîyê dinya danê hempar o û va do bi hêzê xoser û pawitişê cewherî têhet de bê û têkoşîn bikerê.

 

Ozleme qiseykerdişê xo wina dewam kerde: "Şîdetê serê cinîyan her ke şino zêde beno. Yê ke  tacîz û tecawiz kenê û kişenê vanê întîxar kerdê û xo wina xelas kenê. Dewlete kiştoxan bêceza verdena. Polîtîkayê dişminî cinîyan dewam kenê. Ganî ma vera her tewir şîdetî têkoşîn bikerê. Ganî ma heme cinî bi pawitişê cewherî û hêzê xoser de têhet bê."

 

Ozleme tewr peyîn qiseykerdişê xo de arde ziwan ke cinîyan fek têkoşîn ra vera nêdayo û heme têkoşînê cinîyan ê dinya hempar o û wina va: "Yê ke Îzlanda de yê vanê ‘karê têduşt, heqdestîyê têduşt', yê DYA û Ispanya kuçeyan leqnenê. Ma Şengal de yê, Rojawan de yê. Ma veng danê heme cinîyan ke 25ê Teşrîna Peyêne de waran de bê."