COLEMÊRG - Çalakîya ke hetê Parlamentera HDPyî ya Colemêrgî û Hemsereka KCDyî Leyla Guvene ra seba ke tecrîdo girankerde ke Rayberê Şarê Kurdî Abdullah Ocalanî ser o yeno domnayene şermizar bikera, 8ê teşrîna peyêne ra nata grevê vêşanîye de ya û çalakîya Leylaye roja 16. de dewam kena. Cinîyê Colemêrgî reaksîyon nîşan dayî vindetişê hukmatî û veng dayî heme cinîyan ke vengê Leylaye berz bikerî.

 

Hemsereka Kongreya Komelê Demokratîke (KCD) û Parlamentera HDPyî ya Colemêrgî Leyla Guvene seba ke tecrîdo ke Rayberê Şarê Kurdî Abdullah Ocalanî ser o yeno domnayene şermizar bikera, 8ê teşrîna peyêne ra nata grevê vêşanîye de ya. Çalakîya Leylaye roja 16. de dewam kena û her ke şono hîna zaf destekî yenî dayîş. Cinîyê Colemêrgî zî dîyar kerdî ke çalakîya Leylaye çalakîyêka bi rumet a û veng dayî heme cinîyan ke vengê Leylaye berz bikerî. Cinîyan ra Kutrê Turan, Fatma Edîş û Azîze Çetîne derheqê babete de qisey kerdî.

 

'Badê çalakîya Leylaye dêsê tecrîdî rijîyayî'

 

Kutrê Turane ard ziwan ke talebê Leyla Guvene talebê înan o û va: “Ganî pêroyê cinîyan wayîrê çalakîya Leylaye bivejî. Ma nêwazenî Leyla Guvene zindan de bimana. Leylaye bi şaradeya ma ameye weçînayîşe. Ganî sey heme parlementeran aye zî mîyanê şar de siyaset bikera. Bi serran o vera zordestan de xo ver danî. Ma bi çalakîyanê demokratîkan têkoşînê xo heta ewro arde. Badê çalakîya Leylaye dêsê tecrîdî rijîyayî. Veng bidêne Leyla Guvene.”

 

'Tecrîd eybê merdimîye yo'

 

Fatma Edîşe zî daye zanayene ke tecrîd binpaykerdişê heqê merdimîyeyo û wina domnaye: “Leyla Guvene bi çalakîya xo heme cinîyan dawetê têkoşînî kerde. Şexsê Leyla Guvene de heme cinîyê kurdî vera no zîhnîyet û îqtîdarî de bi serran o xo ver danî. Hukmatê tirkî bi serran o hewl dano pê girankerdişê tecrîdî polîtîkayanê xo dewam bikero. Şarê kurd tena wedarnayîşê tecrîdî nêwazeno eynî wext de azadîya Rayber Apoyî zî wazeno. Şexsê Leyla Guvene de pêroyê kurdî zindan de yî. Ganî hukmat fek nê vindetişê xo ra vera bido. Tecrîd eybê merdimîye yo. Vengê Leyla Guvene berz bikerên û tecrîd birijnên.”

 

'Ma do zî keyeyanê xo de dest bi çalakîya bikerî'

 

Tewr peynî Azîze Çetîne qisey kerde û aye zî wina va: “Azadîya Abdullah Ocalanî azadîya heme cinîyan a. Leyla Guvene raybera têkoşînê cinîyê bidestan a. Ganî heme cinîyî pêroyê raşteyan de wayîrê îradeya xo bivejî. Hukmatê tirkî bi tewqîfkerdişê Leyla Guvene îradeya heme cinîyan tepişt û qerarê ma çin hesibna. Eke hukmat çalakîya Leyla Guvene rê nêbo cewab û tecrîd peynî nêkero, ma do zî keyeyanê xo de dest bi çalakîya vêşanîye bikerî.”