Tolîn Muhemed

 

ŞEHBA - 3 domanê Efrinijî ke netîceyê bombardumanê dewleta tirkî û çeteyanê girêdayeyê aye de bê dayîk û pî mendî dîyar kerdî ke ê wazenê Efrîn rizgar bibo û agêrî herra xo ser û vatî: “Ma bêrîya Efrînî kerdî. Ma wazenê agêrî herra xo ser û şer peynî bibo.”

 

Netîceyê bombardumanê dewleta tirkî û çeteyanê girêdayeyê aye de xeylê domanî bê dayîk û pî mendî. 3 domanê bi nameyê Neceh Menen Elo, Ilyes Menen Elo û Muhemed Menen Eloyî netîceyê hêrişan yê dewa Alci ya qezaya Şeraya ya Efrînî de bê dayîk û pî mendî. Domanê ke bê dayîk û pî mendî vatî: “Ma xeylê berîya dayîk û pîyê xo kerdî. Ma no zilmî xo vîra nêkenî.”

 

Domano binameyê Neceh Menen Elo qiseykerdişê xo de wina va: “Ma dewe de bi kêfweşî cuyayêne. La badê ke dewleta tirkî hêriş kerd vengê top û bombeyan kêmî nêbî. Ma bi vengê bombeyan weriştêne û ma nêeşkayêne rakewî. Mektebê ma zî ame bombardumankerdiş û ma nêşîyî mekteb. Serede pîyê mi netîceyê hêrişan de cuya xo vindî kerd. Badê 3 rojan zî dayîka mi. Dayîka mi seba ke ma rê werd bîyara vejîya teber, la ameye qetilkerdiş. Ma Heleb ra koçê dewe kerd û ma ewja de zî raştê hêrişan ameyî. Ma wazenê şer biqedîyo. Ma wazenê mîyanê darê zeytunan de bi hawayo kêfweş azad bicuyî. Erdogan ma bê dayîk û pî vera da. Ez xeylê berîya dayîk û pîyê xo kena.”

 

Sewbîna di domanî zî wina vatî: “Erdogan ma koçber kerd. Gunehê ma çina bî? Ma bêrîya dayîk û pîyê xo kenî. Ma bêrîya Efrîn û herra xo kenî. Ma wazenê agêrî Efrîn û şer biqedîyo. Ma no zilmî xo vîra nêkenî. Ma do bajarê Efrînî dagirkerê ke dayîk û pîyê ma qetil kerdî rê vera nêdî û rizgar bikerî.”