Gulîstan Azak

 

AMED - Avûkat Pîrozhan Karalî dîyar kerde ke pêameyîşê Stenbolî ke Tirkîya zî îmza kerda, têkoşînê ke derheqê vernîgirewtişê şîdetê serê cinîyan esas gêno, serê kaxidî de mendo û ganî a Tirkîya ke pêameyîş îmza kerda, çîyê ke ameyê ferzkerdiş bi ca bîyara.

 

Avûkat Pîrozhan Karalî nê rojê ke 25ê Teşrîna Verêne Roja Piştdayîş û Têkoşînê vera şîdetê serê cinîyan nêzdî beno de, caardişê Pêameyîşê Stenbolî ke Tirkîya zî îmza kerda şîrove kerde û va no pêameyîş seba vernîgirewtişê şîdetê serê cinîyan yeno kerdiş qîm nêkeno la hemleyêke girîng o. Pîrozhane arde ziwan ke Tirkîya heta nika tu pêameyîş û qanûnê derheqê cinîyan de bi hawayêke bi tesîr bi ca nêarda.

 

Pîrozhane da zanayîş ke Pêameyîşê Stenbolî 2011an de wextê wezîra polîtîkayê komelî û keyeyî Fatma Şahîne de ameyo kerdene û pêameyîşê Stenbolî berpirsyarîyê pîl dano serê milê heme selahîyetdarê Tirkîya û wina va: "Pêameyîşê Stenbolî, rayîrê xurtkerdişê cinîyan zî tede teşwîqkerdişê têduştîyê camêrd û cinî, averberdişê polîtîkayê hîsgêrê zayendî, vernîgirewtişê şîdetî û têkoşîn de, şert dano vernîya Tirkîya. Pêwa ke serê pêameyîşî ra 4 serrî derbaz bîyo zî Tirkîya lazimîyê pêameyîşî bi ca nêana. Goreyê raporo ke GRAVIO zî eşkera kerdo, Tirkîya binê ‘rewşa mîyanên' de yena şîrovekerdene. Eke Tirkîya hetgirê pêameyîşêke ba, ganî ferzkerdişê ci zî bi ca bîyara. Tirkîya de qanûn û pêameyîşê ke estê serê kaxidî de manenê. Ma nê zî bi hawayêke eşkera raporê GRAVIO vînenê."