Rûken Goman

 

DÊRIK - Hemsereka Partîya Hemdemî ya Demokratîke ya Sûrîye Elyaa Mûsa derbarê hêrîşênê dewleta tirkî yê Rojawanî ser o qisey kerde û va: “Ma do vera hêrişan de têkoşîn bikerî. Dewleta tirkî nêwazena projeyê demokratîke pê bêrî. Cok ra hêrişê ma kena. La ma do heta peynî vera hêrişan de xover bidî.”

 

Hêriş û dagîrkerîya dewleta tirkî yê vera Başûr û Rojawanê Kurdistanî dewam kenî. Hemsereka Partîya Hemdemî ya Demokratîke ya Sûrîye Elyaa Mûsaye derheqê hêrişanê dewleta tirkî yê herra Rojawanî ser o qisey kerde û dîyar kerde ke Erdogan hêrişê proje û hêzanê înan keno û wazeno ke zîhnîyetê xo yê faşîstî tîya de ca bikero. Elyaa daye zanayene de dewleta tirkî wazena îradeya şaran bişikna, la do nêresa hedefê xo.

 

'Ma do vera kerdişê bêhuqûqî vinderê'

 

Elyaa Mûsaye destpêkê qiseykerdişê xo de va ‘Dewleta tirkî çiman vera daya kêfweşîya şar û seba menfîet û plananê xo yê lêşinan merdiman kena qurban’ û wina dewam kerde: “Dewleta tirkî dewleta dagirker a. Wazena kêfweşîya şar çin bikera û şaran bipelçiqna. Tirkîye nêwazena demokrasî vila biba û problem çin bibî. Çimkî wexto ke problem çin bibî nêeşkena xo biresna hedefê xo. Bi hawayo aşkera dişmenîya kurdan kena. Heme çîyê xiraban şaran ser de dana ferzkerdiş. Ma do vera kerdişanê teberê merdimîye de xover bidî. Vera nê zilmî de çîyo tewr muhîm rêxistinbîyayîş û têkoşîn o.”

 

'Ma do seba onir û kêfweşîya xo têkoşîn bikerî'

 

Elyaa qiseykerdişê xo yê peyênan de wina va: “Dewleta tirkî nêwazena projeyê netewê demokratîke pê bêro û asayî awan bibo. Cok ra hêriş kena. La ma do heta peynî xover bidî û payan ser de vinderî. Dewleta tirkî çiman vera daya kêfweşîya şar û seba menfîet û plananê xo yê lêşinan merdiman kena qurban. Hêzo dagirker û gonîwerd o. Ma eşkenê xo îdare bikerî. Ma seba kêfweşî û asayîya şar têkoşîn danî. Ma do têkoşînê xo dewam bikerî û destûr nêdî ke dewleta tirkî ya dagirker biresa hedefê xo.”