MÊRDÎN - Dimayê ke qayûm tayînê Şaredarîya Bajarê Gird ya Mêrdînî ame kerdene a roje ra nat seba ke reklamê xo bikero, kuçeyan de xebatê ver bi çiman ê xapênaye keno. La tax û kuçeyê Mêrdînî yê ke verê çiman de nîyê mîyanê çopî de yê û kerrayê kuçeyan heme rawiştê.

 

17ê Teşrîna Peyêne 2017an de dimayê ke qayûm tayînê Şaredarîya Bajarê Gird ya Mêrdînî ame kerdene, seba ke reklamê xo bikero dest bi xebatê ke şarî xapêneno kerd. Qayûm nê xebatê xo yê xapênaye bi nêzdîbîyayîşê weçînayîşê mintiqa tewr zêde kerd. La kuçe û taxê ke verê çiman de nîyê şar mîyanê çopî de cuyeno û kerrayê parkî yê taxe heme rawiştê. Na rewşe ra wesayîtî nêeşkenê kuçeyan ra derbaz bibê, domanî nêeşkenê kay bikerê û merdimî nêeşkenê kuçeyan ra derbaz bibê. Boya çopî û lêşînî kuçeyan de vila bîya. Seba nê xebatê xapênaye yê qayûmî hemwelatîyê taxê Kabala, Tabîye, Yenî Yol, Velî Ozan û cayê bîn ke xebat uca de nînê kerdiş cu înan rê herimnayê û nêeşkenê vejîyê verê berê xo.

 

Xebatê meşgulkerdişî

 

Qayûmo ke çimê xo girewto, nêwazeno ke tax û kuçeyê xirabe û mîyanê çopî de mendê rê xizmet bikero, Parqê Karayollari yo ke zergunayî û dar ci zêde yê sey ke nika newe keno seba ke şarî bixapêno reyke bîn xebatê meşgulkerdişî da destpêkerdiş.