WAN - Cinîyê Wanijî dîyar kerdî ke cinîyê kurd bi fikrê Rayberê PKKyî Abdullah Ocalanî rayîrê azadîye de gamê girdî eştî û wina dewam kerdî: “Tecrîdo ke Ocalanî ser o yeno domnayene vera cinîyanê kurdan de yeno kerdiş. Çimkî Ocalan îradeya ma yo. Ganî tecrîd bêro wedarnayîş.”

 

Vera tecrîdo ke Rayberê Şarê Kurdî Abdullah Ocalanî ser o yeno domnayene de reaksîyonê şaran her ke şono zêde beno. Rayberê Şarê Kurdî Abdullah Ocalan 15ê Sibata 1999î ra nata Girawa Îmrali de hucreyê yew kesî de yeno tepiştiş. Ocalan 27ê Temmuza 2011î ra nata nêşêno avûkatanê xo reyde pêvînayîş bikero û tewr peynî 11ê Êlula 2016î de birayê xo Mehmet Ocalanî reyde pêvînayîşêko kilm viraştbi. O tarîx ra nata Ocalanî ra ti xebere nîna girewtene. 

 

Heme muracatê pêvînayîşî ke dozgerîya komarî ya Bursa rê yenî kerdiş bi mehneyanê cîya cîyayan yenî yenî red kerdiş. Na çarçewa de Cinîyê Wanijî Arzu Çîntan, Meryem Takva û Xiyal Yacane qisey kerdî û reaksîyon nîşan dayî tecrîo girankerde ro.

 

'Ocalan seba kurdan muhîm o'

 

Cinîyan ra Arzu Çîntane destpêkê qiseykerdişê xo de reaksîyon nîşan daye tecrîdî ro û va: “Destpêkerdişê tecrîdî ra nata Tirkîye de kaos, şer û krîz vejîyayî. Cinîyê kurd bi wesîleya fikrê Ocalanî gamê gird eştî. Cok ra Ocalan seba cinîyanê kurdan xeylê muhîm o. Ganî cinîyî seba wedarnayîşê tecrîdî têkoşîn bidî û wayîrê Ocalanî bivejî. Ganî seba wedarnayîşê tecrîdî heme kes destê xo bikero binê kerra.”

 

'Şarê kurd Ocalan ra nêqerifîyeno'

 

Cinîya binameyê Meryem Takvaye dîyar kerde ke derheqê rewşa Ocalanî de ti xebere nîna girewtene û wina domnaye: “Dewlete baş zana ke eke çîyêk bo Ocalanî bibo do kurdî dinya xira bikerî ûTirkîye do rehet nêmana. Wa destûr bidîyo ke keye û avûkatî şêrî pêvînayîşê Ocalanî. Wa baş bêro zanayene ke şarê kurd Ocalanî ra nêqerifîyeno. Tecrîd tena Ocalanî ser de nîno meşnayîş eynî wext de pêroyê kurdan ser de yeno kerdiş.”

 

'Ocalan îradeya ma yo'

 

Tewr peynî Xiyal Yacane qisey kerde û wina va: “Wexto ke Ocalan bi komloyêk teslîmê Tirkîye ame kerdiş ma Şirnex de bîye. 10 ciwanî bedenê xo dayî adir ver. Şirnex, Cizîr, Elkê û her ca de çalakî pê ameyî. Pêrodayîş virazîyayî û kesêk daxî tepiştişê Ocalanî qebul nêkerdêne. Şar seba Ocalanî dinya wedarna payan ser. Çimkî Ocalan îradeya ma yo.”