WAN - Endama meclîsê şaredarîya Wanî ya verê Elîf Yîgîte va bêûsulîyê ke ameyê tespîtkerdiş yê qayûmê tayînê şaredarîya bajarê Gird ya Wanî bîyo çira nîno cigêrayîş û wina va: "Mufetîşê ke derzenê geyreyne nika ça de yê? Çira mufetîş nika bêûsulî û rantî nêvejenê meydan."

 

Cigêrayîş hetê xebatkarê sayiştayî ra ameyê kerdene de vejîya meydan ke xeylê şaredarîyê AKPî û şaredarîyê qayûm ameyo tayînkerdiş bi mîlyonan TL bêûsulî ameyo kerdene. Rapor de vejîya ke şaredarîya Bajarê Gird ya Wanî zî 95 mîlyon 372 hezar TL vengbîyayîş esto û qeydê bi qasê 22 mîlyon zî rastî nêmojneno ra.

 

Endama Meclîsê verê ya Şaredarîya Bajarê Gird ya Wanî Elîf Yîgîte dîyar kerde ke sey şaredarîya DBPî senîn ameyî weçînayîş bîlançoyê deyn, ameyîş û şîyayîş vetê û wina va: "Ma nê kombîyayîşan de bi şarî dir pare kerdî. Wexto ke ma şaredarî girewt hîn deynê ci estbi. Ma beşêke pîl ê nê deynî da. Amancê ma dayîşê deynan bi û qedênayîşê deynan bi. Pêwa ke ameyîşê ma zêde nêbi zî ma bi îmkanê xo xebat meşna. Ma yew kuruşê şarî cayêke veng xerc nêkerd. Ma şî dewe, tax û qezayan. Xeylê kêmasî ê cayan de bi. Ewro wexto ke ma şaredarîyê qayûm ewnîyenê, a rojî yenê vîrê ma. O wext senîn şarî xizmet nedî ewro zî eynî çî esto."

 

'Qayûm pozîsyonê hesabdayîşî ame vetiş'

 

Elîfe qiseykerdişê xo wina dewam kerde: "Bi ameyîşê qayûman dir meclîsê şaredarî ame feshkerdiş. Qayûm pozîsyonê hesabdayîşê ameyê vetiş. Wextê ma de îhale rîpelê fermî yê şaredarî de ameyne îlankerdiş û kesî biwaştêne muracatê îhaleyî bikerdêne gorey ci muracat kerdêne. Ewro wexto ke şaredarîya qayûm ewnîyenê, seba îhalî şîyayêke şîyo şarî ra bi nameyê bexşê yeno komkerdiş."

 

Elîfe tewr peyîn qiseykerdişê xo de da zanayîş ke wexto ke wezîfe de bî mufetîş zî bi qasê înan şaredarîyan mesayî kerdêne û va: "Vernîya ma de weçînayîşê mintiqa estê. Ma do şarî dir qayûman biqewernê.”