DÊRSIM - Mazgîrt de yewin namzeda keyayî ya cinî Pelîn Gungorene dîyar kerde ke weçînayîş de seba vengê cinîyan bêro eşnawitiş hacetêke yo û wina va: "Heta ke vengê cinîyan hempar nêvejîyo do rojê weş zî nêrê."

 

Seba weçînayîşê mintiqa ke 31ê Adara 2019an de virazyê partîyê sîyasî startê xebatan dayî. Qezaya Mazgîrtî yê Dêrsîmî zî xebat ameyî destpêkerdiş û cinîya bi nameyê Pelîn Gungorene zî taxa Eltîhatun ya Cor seba keyayî namzedîya xo da ro. Pelîne nika yewin namzeda cinîyan a û tewr zêde hetê cinîyan ra piştdayîş vînena.

 

'Weçînayîş amanc nîyo, hacet o'

 

Pelîne derheqê babete de şîroveyê xo ard ziwan û wina va: "Weçînayîş her wext hacet bi. Mi bi zanayîş muracatê xo kerd. No hacet zî seba mi amanco ke vengê cinîyan bêro eşnawitiş hewêneno. Seba problemê cinîyan bîyarî ziwan mi hemle eşt."

 

'Cinî her wext cu mûnenê'

 

Pelîne dewam de da zanayîş ke cinî her warî de bi keda xo estê, la heqê înan yê vatişî nîno dayîş û va cinî cu newe ra mûnenê la warê komel û sîyasî ra yenê dûrvistiş. Pelîne tewr peyîn qiseykerdişê xo de bale ante serê piştdayîş û têkoşînê hempar ê cinîyan û va ê cinîyê qeza eşkenê xo tewr weş bikerê û va ganî cinî her wext verê yewbînan de ca bigîrê.