ENQERE - Cinîyê Platformê Cinîyan ê Enqereyî sey her serre do emsar zî 25ê Teşrîna Peyêne de kuçeyan de bi. Nebîye Mertturke dîyar kerde ke bi serran o kuçeyê Enqereyî de vengê xo berz kenê û wina va: "Qedexeyê dewlet û polîsan heta nika ma nêpelçiqna. Do tîya ra tepya zî nêeşkê bipelçiqnê."

 

Platformê Cinîyan ê Enqereyî ke endamê sendîka, sosyalîst, sîyasetmedar, wendekar, femînîst, LGBTÎ û xeylê hetê bîn dir awan bîyo, serrê 2000î heta nika kuçeyê Enqereyî de vera şîdet, tacîz û îhlalkerdişî têkoşîn kenê. Pêwa qedexe û tepişnayîşan dimayê OHALî zî cinîyan kuçeyan terk nêkerdê. Endama Platformê Cinîyan ê Enqereyî û Sekreterê Cinîyan Keyeyêşarî Nebîye Mertturke derheqê averşîyayîşê peyîn û têkoşînê cinîyan platfrom de qisey kerdî.

 

Nebîyeye da zanayîş ke şîdetê serê cinîyan kêm nêbîyo û her ke şino zêde beno û wina va: "Serrê peyînan de 400î ra tewr zêde cinî ameyî qetilkerdiş. Xeylê kesî rastî îstîsmarî ameyî. Cinî û domanî rastê şîdetî ameyî. Bêguman sebebê nê çîyan estê; polîtîkayê dewletê û pawitişê camêrdê kiştoxan. Ma sey platform xo rojevê cinîyan ê Tirkîya û Enqereyî berpirsîyar vînenê. Serrêke de vera heqê cinîyan zî hêriş virazyayî."

 

Nebîyeye tewr peyîn qiseykerdişê xo de da zanayîş ke verê heme averşîyayîşê peyînan vera şîdet û tacîzî bêveng nêmendê û va do reyna seba protestokerdişê şîdetî vera cinîyan do 25ê Teşrîna Peyêne de kuçeyan de bê.