Ehlem Heci-Nesrîn Hisen

 

ŞENGAL - Hemwelatîyê Serdeştî yê ke mewsîmê zimistanî de çadiran de cuyenê, xeylê zehmetîyan ancenê. Verê zehmetîyê ke ancenê reyan bi zehmetîyê xoza dir zî rî bi rî manenê.

 

Serdeşt de hema zî xeylê welatî şert û mercê zimistanî de çadiran de têkoşînê cuye danê. Mîyanê nê rojan de Serdeşt de seba varano zêde ke vara, biluskî eşt çadira ke keye tede cuyane, keyeyî eştişê biluskî ra zirar nêdî la çîyê ke bi cereyan ameyne xebitnayîş zirar dî. Keyeyo ke çadira înan biluskî ra zirar dî Baran Mirade qisey kerde û va ê çadiran de tewr zaf zehmetî ancenê û zafê ci şert û mercê zimistanî de cuya înan tewr zehmet bena û cuya înan kona xeterî.

 

Cinîya bi nameyê Baran Mirade ke yew keyeyanê ke çadiran de cuyena ra ya wina qalî kerde: "Ma rewşêke zehmet de cuyenê. Bi çend serrî yo Serdeşt de ma çadiran de cuyenê. No seba ma zaf zehmet o, problemê çinbîyayîşê awe esto. Verê di rojan biluskî da çadira ma ro û çadira ma kerd di perçe. Ma bi zor domananê xo xelas kerd. Heme çîyê ma yê cereyanî xira bî û cereyanê çadira ma zî şi. Ma wazenê ke problemê ma bêrê çareserkerdiş û seba nê piştdayîş bêro kerdiş."

 

Çarçeweya piştdayîşê ke bêro dayîş de Meclîsê Tevgerê Azadîya Cinîyê Êzidî yê Serdeştî serdayîşê keyeyê Baran Mirade kerdî û hetkarî dayî keye. Endame meclîsê Serdeştî Mircan Mirade dîyar kerde ke bi çar serrî yo welatî  binê zor û zehmetîyan de cuyenê û ê sey meclîsê cinîyan bi her tewir amadeyê ke şarê xo rê hetkarî bikerê."