STENBOL- Berpirsîyara Kampanyayê Tirkîye ya Rêxistina Efû ya Mîyanneteweyî Mîlena Buyume dîyar kerde ke çalakîya Dayîkê Şemeyan huqûqê mîyanneteweyî û Tirkîye de heq a û astengerdişê çalakîye binpaykerdişêk cidî ya. Mîlenaye daye zanayene ke bi hedefê piştîdayîşê Dayîkê Şemeyan kampanyayêka mîyanneteweyî dayî dest pêkerdiş û heta qedexe nêro wedarnayîş kampanya do dewam bikera.

 

Hewteyo 700. yê çalakîya Dayîkê Şemeyan ke her hewte Raşteyê Galatasarayî ya Stenbolî de ameyêne viraştişî polîsî bi fermanê Suleyman Soylu hêrişê çalakgeran kerdbî û badê no hewte çalakî ameye astengkerdişe. Berpirsîyara Kampanyayê Tirkîye ya Rêxistina Efû ya Mîyanneteweyî Mîlena Buyume tewrê çalakîya hewteyo 711. bîye û dîyar kerde ke ê şopdarê doze yî.

 

'Ma do kampanya xo dewam bikerê'

 

Mîlena  qiseykerdişê xo de bale nate binpaykerdişê heqan yê Tirkîye ser û wina va: “Qedexeyê Raşteyê GalatasarayÎ nîno qebulkerdiş. Heqê keye û merdiman esto ke aqûbetê merdimanê xo yê vindîbîyayeyan pers bikerî. No heq huqûqê dinya û Tirkîye de esto. Astengkerdişê no heqî binpaykerdişêko cidî yo. Ma hetê Dayîkê Şemeyan de yî. Ma heme raşteyê mîyanneteweyî de kampanya daye dest pêkerdiş.”

 

Mîlenaye qiseykerdişê xo yê peyênan de wina va: “Ma do seba Dayîkanê Şemeyan her hewte bêrî têhet û aqûbetê merdimanê înan bipersî. Kapmanyaya ma dewam kena. Seba ke Tirkîye biba welatêka azade çina destê ma ra bêro ma do bikerî.”