Habîbe Eren

 

ENQERE -16. Daîreya Mehkemaya Cezaye qerarê mehkemaya herêmî yê derheqê doza derbeya 12ê Êlule ke Fermandarê Pêroyî Kenan Evren û Fermandarê Hêzê Hewayî Tahsîn Şahînkayî ameyêne muhakemekerdiş xira kerde. 

 

Doza derheqê xirakerdişê qerarî do 18ê çileyê 2019î de 10. Mehkemaya Cezaya Giran ya Edlîyeya Anqara de bêra dîyiş. Federasyonê 78an ra Şorişger Sevîl Turgute qisey kerde.

 

Sevîle nameyê federasyonî ser o qisey kerde û derheqê xirakerdişê qerarî de wina va: “No waştiş de vatî ke na doze tena bi 5 fermandaranê derbe sînor nîya. Ma hewl danî heme kadroyanê derbe bêrî muhakemekerdiş. Eke hesabperskerdiş bibo wa hesabperskerdişêk raşt bibo. Hetêk derbe ra feyde herîneno û sewbîna hetêk zî vera derbe de xo nîşan dano. Na rewşe bawerî nêdana merdiman. Her çiqas ke derbe ra 38 serrî derbaz bibo zî zîhnîyetê 12ê Êlule dewam keno. Wina aseno ke nîyetê kesêk çin o derbekaran ra hesab bipersî.”

 

'No hesabperskerdiş cinîyan nêzdî ra eleqedar keno'

 

Sevîle qiseykerdişê xo yê peyênan de dîyar kerde ke şer û derbe ra tewr zêde cinî û domanî zirar vînenî û cok ra no hesabperskerdiş cinîyan nizdî ra eleqedar keno. Sevîle tewr peynî veng daye heme cinîyan ke tewrê roniştişê doza 18ê çeleyî bibî.