M.A ra vengdayîşê 'Wa cinî mi xo vîr ra nêkerê'

  • 09:29 16 Teşrîna peyêne 2018
  • NAROJANE
Hîkmet Tunç
 
WAN - 3 wayê ke rastê îstîsmarê zayendî yê qorîcî Tekîn Gulaçti ameyî, M.A dîyar kerde ke cezaya ke sucdarî rê ameya birnayîş hêvî daya aye, la hema zî lazimîyê aye bi piştdayîşê psîkolojîk esta û wina va: "Wa êdî 25ê teşrîna peyêne de cinî mi xo vîr ra nêkerê."
 
Qezaya Payîzava yê Wanî dewêke de 15ê Kanûna 2016an de vejîya meydan ke 3 wayê ke 2 ci ra domanê astengdar ê, rastê îstîsmarê zayendî yê qorîcî Tekîn Gulaçti ameyê. Dewaya ke gumanbar tewqîfkerde ameyne muhakemekerdiş, rojê vîyarte de bi 40 serrî û 10 aşmî ceza netîce bî. Wayan ra M.A ya 18 serrî bi wesîleyê 25ê Teşrîna Peyêne Roja Têkoşînî yê Vera Şîdetê Serê Cinîyan ê Mîyanneteweyî mesajêke da.
 
'Komel vera camêrdo sucdar, ma sucdar keno'
 
M.A arde ziwan ke îstîsmaro zayendî heme cuya aye serûbin kerda û va hedîse bi qalîkerdişê waya aye ke wendegehî de qalî kerda vejîyaya û wina va: "Vera camêrdo sucdar ma komel ra yenê dûrvistiş. Coka ma dewe de nêmendî. Tekîn kesoke bi zanaye ameyne naskerdiş. Dewe de pêwa ke îmam nêbi zî nimaj bi ey dayne kerdene. Dimayê hedîse her kes ma sucdar vînayne. Dima ra ma keyeyê xo rijna û ma ameyî Wan.”
 
‘Ez wazena piştdayîşê psîkolojîk bigîrî'
 
M.A da zanayîş ke seba tedayê komelî vera feqîrî zî têkoşîn kenê û wina va: "Ma kira de manenê. Her di wayê mi keyeyê heskerdişê yê dewlete de ameyî bicakerdiş. Ez verê şîne merkezê rehabîlîtasyonî. La seba raporî nêeşkeya newe bikerî, êdî nêeşkena şîrî. Keye de tena biray mi xebityeno. Pîyê mi reyan hemalî keno. Ez wazena piştdayîşê psîkolojîk bigîrî.”
 
‘Ez seba cezaya ke ameya dayene kêfweş bîya'
 
M.A dîyar kerde ke feqîrî zaf girîng a û wina qedêna: "Ez êdî bi hêvî ewnîyena cuye ra. Ez çîyo ke ci dir eleqedar bibî vînena. Cezaya Tekîn rê ame birnayîş mi kêfweş kena. Ez veng dana cinîyan ke wa 25ê Teşrîna Peyêne de mi xo vîr ra nêkerê."
 
‘Ez seba piştdayîşî spas kena'
 
Maya domanan zî seba piştdayîşê cinîyan spas kerde û wina va: "Seba hedîse ame sereyê ma, merdimê ma ma sucdar kerdî. La cinîyan ma tena nêverda. Seba cezaya ke ameya dayene ma kêfweş ê. Ez cinîyan rê spas kena."