Dîlan Babat

 

QERS - Ezgî Menguogluya ke 2 aşmî yo dewa Ermîşler ya qezaya Susuz ya Qersî de mamostayîya bi pere kena, hetê Mudirê Perwerdeyê Neteweyî ra bi mehneya ‘keyeyê aye de HDPyî estî, cok ra ma mecburî aye wezife ra bigîrî’ kar ra girewt.

 

Ezgî Menguogluye 2 aşmî yo ke dewa Ermîşler ya qezaya Susuz ya Qersî de mamostayîya bi pere kena. Her çiqas ke ‘cigêrayîşê ewleyî’ derbaz bikera zî hetê Mudirê Perwerdeyê Neteweyî ra bi mehneya ‘keyeyê aye de HDPyî estî, cok ra ma mecburî aye wezife ra bigîrî’ kar ra ameye girewtene.

 

Birayê Ezgîye, Engîn Menguoglu dîyar kerd ke ‘cigêrayîşê ewleyî’ de çîyêk nêvejîya û wina va: “Waya mi seba dewa ke ma tede manenî muracatê mamostayîya bi pere kerde. Seba ke pereyo ke dayêne kêmî bî nêeşkayêne şêra sewbîna cayêk û bêra. Kewte ‘cigêrayîşê ewleyî’ û derbaz bîye. Rojanê verênan de kombîyayîşê waya mi estbî. Mudirê Perwerdeyî waya mi gêrayo û tena waya mi kerdî kombîyayîş. Aye rê vatî ‘keyeyê şima de HDPyî estî, cok ra ma mecburî to wezife ra bigîrî.’”

 

Engîn tewr peynî dîyar kerd ke waya ci Ezgî reaksîyon nîşanê rewşe daya û wina qedêna: “Ma ser de vêşanî ferz kenî. Di wayê mi bi serran o paweyê tayînê xo yî. Seba ke nînê tayînkerdiş mecbur manenî mamostayîya bi pere bikerî.”