STENBOL - Doktorî dîyar kerdî ke ‘Pêşnîyaza Şîdeto ke Weşî de ya’ pawitiş ceza kena û wina vatî: “Îqtîdar kedkaranê weşî bê îtîbar keno. Na rewşe binpaykerdişê tewr pîl ya dinya ya. Ê nêeşkenê heqanê maç in bikerî. Ma do destûr nêdî no qanûn derbaz bibo.”

 

‘Pêşnîyaza Qanûnî ya derheqê bedilnayîşê tay qanûnanê weşî’ nê rojanê peyênan de Komîsyonê Meclîsî de ame qebulkerdiş û erşawîyaye Heyetê Pêroyî. Reaksîyon û çalakîyê kedkaranê weşî û rêxistinê meslekî dewam kenî. Doktorê Stenbolî dîyar kerdî ke do destûr nêdî pêşnîyaze meclîsî de derbaz biba.

 

'Pêşnîyaze pawitiş nîya cezaya ya'

 

Doktora beşê lezgînî Çîgdem Arslane derheqê pêşnîyaze de qisey kerde û wina va: “Vera kedkaranê weşî de her tewir şîdet pê yeno. Pêşnîyaza ke rojeve de ya pawitiş nê sey cezaya ya. Na pêşnîyaze de hekîmê ke bi Qerarnameyê Hukmê Qanûnî (KHK) ameyî îxraçkerdiş meslek ra yenî menkerdiş û qetî nêeşkenî agêrî karê xo. Wexto ke ma wezîfeyê xo kenî, ma nêweşan goreyê fikrê îdeolojîk cîya nêkenî. Fikrê ma çina bibo zî ma tena karê xo îcra kenî.”

 

'Ma do destûr nêdî qanûn derbas bibo'

 

Doktora domanan Çagla Sevene zî daye zanayene ke heta nika sereraştkerdişê ke ameyî kerdiş vernîya şîdetî nêgirewtî û va: “Şîdet bi qanûnanê winasî hîna zêde beno. Ti cayêk dinya de çîyêk winasî çin a. Bin nameyê cigêrayîşê ewleyî de doktor karê xo ra yenî dûrî kerdiş. do nêeşkenî heqanê ma bigîrî. Ma do destûr nêdî ke pêşnîyaze biba qanûn û meclîs de derbas biba.”

 

Doktor Suheyla Agkoçe zî dîyar kerde ke wezîrê weşî vatişê ke kedkaranê weşî bê îtîbar keno timî xebetneno.