WAN - Cinîyê ke mecbur manenê şert û mercê nêbaş de bixebityê, seba vernîhukmê komelî nêeşkenê tacîzo ke ey dir yenê rî bi rî qalî bikerê û wina vatî: "Ma hewl danê ke vernîya tacîz û etda bibirnê."

 

Sacîde Kizilaya ke dimayê ke unîversîte qedêna, warê xo de kar nêdî, bi embazanêxo dir kafeyêke akerde û bi 4 serrî yo kafe de xebityena. Sacîdeye dîyar kerde ke pêwa heme çî aye hedef kena ke serê lingan de bimana û bêra cayêke.

 

'Krîzê ekonomî problemê heme esnafan o'

 

Sacîdeye wina va: "Verê bazirganîya cinîyî de ma vera krîzê ekonomî zî têkoşîn kenê. Verê kafe tewr qerebalix bî la bi di aşmî yo sey verê nîya. Ma nika nêeşkenê kîra bidê. Ma nêeşkenê lazimîyê xo zî bigîrê. Cinîyê ke kafeyan de xebityenê zî rastê tacîzê camêrdan yenê. Ma nêeşkenê nê tacîzan biarê ziwan. Yenê nimtiş. Seba ke komel ma rê no ferz keno. Ma nêeşkenê fikrê bîyaye birijnê. Pêwa nê zehmetîyan ma hewl danê ke vernîya tacîz û teda bibirnê."

 

Sacîdeye dewamê qiseykerdişê xo de arde ziwan ke cinîyê ke warê karî de rastê hêrişê zayendî û şîdetî yenê, nêeşkenê bîyarê ziwan û va ganî vernîya heme çî zîhnîyetê camêrdan bêro vurnayîş.

 

12 saetî serê lingan de xebityenê 

 

Hasret Notere zî ke mexezayê cil û belgan de xebityena dîyar kerde ke aye serê siba saete 09.00an de yena cayê kar û heta 21.00an xebityena û wina va: "Ma her wext rincan ê. Seba ke ma serê siba ra heta şan de serê lingan de yê. Keyeyê mi nêwazeno ez bixebityî la seba lazimîyê xo mecbur xebityena."

 

Cinîya bi nameyê Cahîde Sakara ke 3 serrî yo mexezaya cil û belgan de xebityena arde ziwan ke pêwa zêde mesayî kenê zî pereyêke zêde nêdanê û va ê rastê mobîngê karsazan zî yenê. Cahîdeye wina va: "Ma rastê tacîzê vatişê muşterîyê camêrdan yenê. La ma nêeşkenê nê wayîrê karî ra vajê. Seba ke munaqeşeyêke vejîyo kar ra vejenê. Ez verê zî kafe de xebityayne. Ma uca de zî rastê tacîzê muşterîyan ameyne. Ma nêeşkenê tacîz wayîrê kar ra vajê."