Tolîn Muhemed

 

ŞEHBA - Mizgîn Remzî Elûşa dewa Til Silwrî yê qezaya Cindirêsî de yê, pêwa heme şert û mercê xidar yê koçberî de hêvîya ageyranayîşê Efrînî vindî nêkerda û vana: "Bi ameyîşê zimistanî rewşa ma hîn xidar bena. Pêwa nê ma hewl danê ke têkoşînê cuye bidê."

 

Dimayê hêrişê dewleta tirk û komê girêdayê aye şarê Efrînî Kantonê Şehba de bi ca bî. Mizgîn Remzî Elûşa ke Şehba de bi ca bîya va ke aye pêwa heme xidarîyan serê linganê xo de vindena û xo ver dana.

 

'Ez û domanê xo pîya têkoşînê cuye danê' 

 

Mizgîne dîyar kerde ke aye û hîrê domanê xo pîya cuyenê û bi zehmetîyê pîlan dir rî bi rî manenê û wina va: "Seba ke şertê zimistanî xidar ê, ma zî nê dir rewşêke zehmet de cuyenê. Wexto ke varan varena zereyê odaya ma bena pirr î awe. Seba ke îmkanê kar î tîya tayê ma hetê ekonomîya xo de zî zehmetî ancenê. Ez xeylê rey nêeşkena lazimîyê domananê xo bi ca bîyarî. Ez û domanê xo pîya têkoşînê cuye danê."

 

'Ma wazenê ageyrê Efrîn'

 

Mizgîne qiseykerdişê xo wina qedêna: "Ez û domanê xo ma wazenê ageyrê Efrîn û ageyrê serê herra xo. Dagirkerdişê dewleta tirk û çeteyê aye nîno qebulkerdene. Ma bi dagirkerdiş kewtî na rewşa xirab. Bi ameyîşê zimistanî rewşa tewr xirab bena. Pêwa nê ma hewl danê ke têkoşînê cuye bidê. Çi beno wa bibo ma na bawerî de yê ke, ma do rojêk ageyrê serê herra xo û ma do dagirkeran biqewernê. Do serkewtiş ê dagirker û çeteyan ney, serkewtiş do ê ma bo."