WAN - Parlamentera HDPî ya Colemêrgî Leyla Guvene ke hepisxane de tepişnayîya waştî ke bi kelepçe bîyarê dadgehe, 7ê teşrîna peyêne de dest bi grevê vêşanî kerde. Sîyasetmedarê cinî dîyar kerdî ke Leyla îradeyê şarî ya û ganî waştişê aye bêrê ca.

 

Hemsereka Kongreya Komelê Demokratîke (KCD) û parlamentera HDPî ya Colemêrgî Leyla Guvene ke hepisxaneyê Tîpê E yê Amedî de tepişnayîya, bi amancê protestokerdişê nêzdîbîyayîşê dadgehe û tecrîdê Rayberê PKKî Abdullah Ocalanî ser 7 teşrîna peyêne de îlan kerde ke dest bi grevê vêşanî kerde. Xeylê het ra seba Leylaye mesajê piştdayîşî ameyî û sîyasetmedarê cinî yê Wanî zî va ê do heta peynî çalakîya Leyla rê piştdayîş bidê.

 

Hemşaredara Artemîtê Wanî Rojbîn Çetîne va vindertişê Leylaye ca de yo û wina va: "Sey parlamenterêke şarî ya, dîyar kena ke vera tecrîdî dest bi grevê bêdem-bêdor kerda. Dîyar kena ke ê tecrîdê serê Birêz Ocalanî qebûl nêkena û sey cinîyêke nuqtaya ke ameya, bi xêrê têkoşînê azadîya cinîyan ê Abdullah Ocalanî ameya. Ma sey sîyasetmedarê cinî yê HDPî heta peynî piştdayîş danê grevê Leylaye. Ma azadîya Leyla waştiş kena."

 

'Ma heta peynî piştdayîş danê'

 

Hemsereka DBPî yê Wanî Aynur Tarhane zî arde ziwan ke Leyla bi hawayêke vera huqûqî hepisxane de ya û wina va: "Leyla îradeyê şarî ya û ameya weçînayîş. Ma sey cinî heta peyîn piştdayîş danê grevê vêşanî yê Leyla. Ganî waştişê aye bi ca bîyarê."

 

Hemsereka HDPî ya Wanî Yadîşen Karabulake zî arde ziwan ke Leyla 24ê Hezîrane de sey îradeyê şarî yê Colemêrgî ameya weçînayîş û va bi tu hewa vindertişê dadgehe qebûl nêkenê û heta peynî piştdayîş danê grevê Leylaye.