Rojda Aydin

 

MÊRDÎN - Arîn û Avestaya ke tewrê dayîka xo Vesîle Yuksele zindan de mendêne mecbur mendî ke yewbînan ra cîya bibî. Avestaya 6 serrî ke seba şêra mekteb zindan ra ameye vetiş wina va: “Waştişê mi yê rojbîyayîşê mi o yo ke dayîk û waya mi hetê mi de bî.”

 

Vesîle Yuksel sibata 2017î de bajarê Mêrdînî de parekerdişê xo yê medyaya sosyalî ‘propagandaya rêxistine kerd’ vera ameye tepiştiş û mehkema de persê ‘PKK rêxistinêko terorî yo an nê’ aye rê ameye perskerdiş. Vesîle cewabê ‘nê’ daye mehkema û tewrê kênayê xo Arîn Mîrkan (4) û Avesta (6) erşawitî zindan. Vesîleye sere de berdî Zindanê Tîpa Eyî yê Mêrdînî û 7ê sibata de tewrê kênayanê xo surgunê Zindanê Tîpa Myî yê Bayburtî ameyî kerdiş.

 

Cezaya Vesîle çîleyê 2019î de qedîyena. Arîna ke tewrê dayîka xo 8 aşman zindan de mende şert û mercê zindanî vera timî nêweş kewtêne û Avestaye zî seba ke şêra mekteb dayîk û waya xo ra ameye cîyakerdişe.

 

‘Kincê qalinan xo ra bide’

 

Mêrdeyê Vesîle, Sultan Yukselî dîyar kerd ke badê ke Avesta zindan ra vejîyaya nêweş kewta û va: “Ma rewşa Avesta ra şikin î. Avesta sey embazanê xo nêeşkena qisey bikera û xover kewena. Avesta waya xo Arîne û dayîka xo vera zaf hissin a. nêwazena şêra mekteb. Avesta telefon de waya xo Arîne rê vana ‘kincê qalinan xo ra bide. Ya nê ti yê nêweş bikewa.’ Vana heta ke dayîka mi nêra ez nêşona mekteb.”

 

'Doktor bê muayene derman da'

 

Sultanî dewamê qalîkerdişê xo de qala şert û mercê zindanî kerd û va: “Şert û mercê zindanî seba domanan xeylê xirab o. Cinîya mi telefon de vana ‘şetê tîya sey serranê 80 û 90an o. Gardîyar bi kêfî têgêrenî. Mektubanê ma nêdanî. Awa germ vera nêdanî. Arîne nêweşe bîya. Doktor bê muayene derman da. Derheqê mi de bi îdîaya heqaret bi doktor kerda de doze akerdî.”

 

'Leşkerî her roje cigêrayîş kerdêne'

 

Avestaye zî qiseykerdişê xo de daye zanayene ke aye xeylê bêrîya dayîk û waya xo kerda û wina va: “Ez wazena dayîka mi mi biba mekteb. Leşkerî her roje cigêrayîş kerdêne. Dest ronayêne kitaban ser. Ma nêeşkayêne kayan kay bikerî. Arîne zaf bêrîya mi kerda. embazêk ma yê binameyê Koçer estbî. Robjîyayîşê mi nizdîyo. Waştişê mi yê rojbîyayîşê mi o yo ke dayîk û waya mi hetê mi de bî.”