AMED - Hemşaredara Qilabanî ya ke qayûm tayînê aye bîyo, Zeynep Urene dîyar kerde ke do weçînayîş de bi îradeyêke xurt vejîyo meydan û wina va: "Ma do vera tehdîdan sere nêtewênê. Namzedê AKPî yê nê, do namzedê ke şarê ma wazeno namzedîyê înan bêro ronayîş."

 

Amadekarîyê mintiqa yê 31ê Adara 2019an de yenê meydan dest pêkerdî. Emsar vera DBPî do HDP biko weçînayîşê mintiqa.

 

'Ganî ma şaredarîyanê xo îşgalkerdoxan ra bigîrê'

 

Hemşaredara Qilabanî ya HDPî Zeynep Urene bale ante serê proseso ke teda vejîyayê sewîyeya tewr berz û wina va: "Qayûm tayînê serê ziwan, kultur û tarîxê ma kerdê. Her cayê ma girewtê û xebatê ma dayî vindernayîş. Xozaya ma yena talankerdiş. Şarê ma no het ra bedelê pîl dayê û dejê pîl î cuyayê. Ma do no weçînayîş de bi HDPî dir mintiqa de bixebityê û heme sazgehê xo yê ameyê padayîş newe ra abikerê û no het ra bimabên bixebityê. Ma mecbur ê ke şaredarîyê xo yê ameyê îşgalkerdiş newe ra bigîrê."

 

Zeynebe eynî wextî de bale ante serê vatişê Tayyîp Erdoganî yê sey ‘kesê ke têkilîyê înan bi terorî dir esto ma do qayûm tayînê vera înan bikerê' û wina va: "Bi tehdîdan wazenê vernîya ma bigîrê. Şarê ma do wayîrê îradeyê xo vejîyo. Ma bi tu hewa tehdîdan nêkenê xem. Partîya ma û şarê ma kam bikero namzed ma do raya xo bidê înan. Do şar namzedanê xo dîyar bikero. Şar qayûman ra zaf acis o. Do namzedê AKP û dewlete nêvejîyê."

 

'Do cinî bibê rayber'

 

Zeynebe tewr peyîn qiseykerdişê xo de wina va: "Her ca yê Tirkîya de ma do sey HDP îradeyêke xurt vejê meydan. Ma do dişminê xo kêfweş nêkerê. Do taybet cinî rayberîya nê prosesî bikerê. Rayberê rastî û yewîye do cinî bê. Ganî vera zulmî her kes dorê HDPyî de bibo yew."