Lîlav Elî 

 

ŞEHBA - Cinîyê Efrînî ke Kantonê Şehbayî de bi ca bîyê dîyar kerdî ke ê do qetî bawerîya înan ê bi têkoşînê şerwanê YPJ/YPGî yê seba xelisnayîşê Efrînî nêşikîyo."

 

Têkilîyê babeta xelisnayîşê mintiqaya Efrînî, Cinîyê Efrînî ke Kantonê Şehbayî de bi ca bîyê û têkoşînê xo dewam kenê, derheqê babete ser şîroveyê xo kerdî. Cinîyan dîyar kerd ke ê do heta peynî serê rêçe şehîdanê xo de têkoşînê xo dewam bikerê.

 

'Ma waşt ma domananê xo bipawê'

 

Cinîya bi nameyê Hêvîn Cemîl Dawd ke Kantonê Efrînî ra ya û nika Şehba de bi ca bîya wina vana: "Dimayê xoverdayîşê 58 rojan vera çeteyê OSOyî, seba pawitişê domananê xo ma koçê Şahbayî kerd. La Efrîn de şerwanê YPJ/YPGî  çalakîyê xo yê vera çeteyê OSOyî dewam kenê. Her çalakîyêke şerwanan hêz,  bawer û îradeyê ma yê seba têkoşînî tewr zêde keno. Ma do heta peyîn kîşte şerwananê xo de bê, qetî îradeyê ma nêşikêno."

 

'Cinîyan kenê hedef'

 

Cinîya bi nameyê Xanim Muhemede zî wina va: "Çeteyê OSOyî Efrîn de bi taybet cinîyan kerdêne hedefê hêrişê xo. Çete bi nê hêrişanê xo wazenê îradeyê cinîyê kurdan û şarê Efrînî bişiknê. La wa qetî xeyal nêkerê ke rojêke ma xoverdayîşî xo ra fek vera bidê. Bawerîya ma bi şerwananê ma ra esta û ma do Efrînê xo xelas bikerê."

 

Heto bîn ra cinîya bi nameyê Ewaş Muhemed zî da zanayîş ke ê do qetî bawerîya xo xelisnayîşê Efrînî ra nêşiknê û wina va: "Ma hêzê xo şerwanê YPJ/YPGî ra gênê. Serê rayîrê şehîdanê xo de heta peyîn ma do xoverdayîşê xo dewam bikerê."