AMED - Endama PMyî ya HDPyî Yuksel Mutlu qala Pêşnîyaza qanûnî ya efu ke MHP ame kerdî kerde û va: “Seba ke pêşnîyaze komelî îfade bikera, ganî hepsîyê siyasî zî bigîra xo mîyan. Eke na pêşnîyaza qanûnî ya efu bikewa dewre do komel de biba sebebê travmayan.”

 

Rojeva demê peyênan ra yew zî Pêşnîyaza qanûnî ya efu ke MHP ame kerdbî ya. Endama PMyî ya Partîya Demokratîke ya Şaran (HDP) Yuksel Mutluye derheqê pêşnîyaza qanûnî ya efu de qisey kerde û dîyar kerde ke eke pêşnîyaze biba qanûn do komel de rayîrê travmayê neweyan biabî.

 

'Pêşnîyaze de kiştoxê cinîyan û sucdarê îstismarî yenî veradayîş'

 

Yuksele arde vîr ke tarîxê Tirkîye de babeta efu ge-ge ameya rojeve û wina dewam kerde: “Pêşnîyaza ke MHP amade kerdo de kiştoxê cinîyan û sucdarê îstismarî yenî veradayîş. Eke pêşnîyaze biba qanûn do komel de travmayêk cîdî bivirazîya. Kesê ke nêameyî rehabîlîtekerdiş do komel de sucan zêde bikerî. M ana rewşe efuya Rahşane ra zanî. Ma vanê wa tecawizkar nêgirîyê çarçeweya efu û nêvejîyî teber. Badê hende serran reyna tecawizkar û kiştoxê cinîyan pawenî.”

 

'Hewl danî hetgiranê xo serbest vera bidî'

 

Yuksele dewamê qalîkerdişê xo de bale ante hedefê pêşnîyaza MHPyî ser û wina va: “Hewl danî rayanê xo zêde bikerî, mafya û çeteyanê sey Alaatîn Çakiciyî zerre ra vejî teber. Yanî hedefê MHPyî oyo ke efu rojeva komelî de bidî roniştiş û hetgiranê xo serbest vera bidî.”

 

'Pêşnîyaza efu komelî îfade nêkena'

 

Yuksele tewr peynî bi hawayo hîra qala nuqtayanê pêşnîyaze kerde û wina qedênaye: “Pêşnîyaze de hepsîyê siyasî çin î û komelî rê xizmet nêkena. Na pêşnîyaza efu komelî îfade nêkena. Seba ke pêşnîyaze komelî îfade bikera, ganî hepsîyê siyasî zî bigîra xo mîyan. Kesê muxalîf ameyî tepiştiş û tewqîfkerdiş. Sucê înan çi yo? No welat de merdim fikrê xo vera yeno tepiştiş û demokrasî çin a. AKP seba ke pêşnîyaze bikero pêşnîyaza xo yê MHPyî red keno. Efuya AKPyî zî do yê MHPyî ra cîya nêba.”