AMED - Hemşaredara Payîzava Yildiz Çetîna ke qayûm tayînê herinda aye ameybî kerdiş badê ke yew serrî zindan de mende û vejîya xebatanê Payîzava dewam kerde. Yildize daye zanayene ke şar heta weçînayîşê herêmî yê 2019î selahîyet dayo înan û wina va: “Ma karê xo ser de yî. Bi qayûman îradeya şarê kurdî nîno çin kerdiş.”

 

3ê sibata 2017î de qayûm tayînê Şaredarîya Payîzava ya Wanî ame kerdiş û dima ra hemşaredara Payîzava Yildiz Çetîne ameye tepiştiş. Yildize yew serrî zindan de mende û badê ke vejîya xebatanê Payîzava dewam kerde. Yildize daye zanayene ke qayûmo ke tayînê herinda aye ameyo kerdiş şaredarî kerdo binê deynan û îradeya şar çin yena hesibnayîşe.

 

'Xeylê arazîyê şaredarî ameyî rotiş'

 

Yildize qiseykerdişê xo de dîyar kerde ke şar heta serra 2019î de îradeya xo teslîmê înan kerdo û wina dewam kerde: “Cok ra ma xebatan dewam kenî. Ma polîtîkayanê qayûm û tewqîfkerdişan ra gamêk apey nêerzenî. Xebatêka xoser yê qayûmî çin a. Netîceyê planê 5 serran de îhaleyê projeyê ma estbî û ma înan pê anî. Xebatêka aîdê înan çin a. Xeylê arazîyê ke aîdê şaredarî bî ameyî rotiş. Şaredarî kerdî binê deynan û bi no hawa xebatan kenî. Qayûm projeyanê ma yê nêmîcetan temam keno û projeyêk ê çin o.”

 

'Ma do cayê ke mendî ra dewam bikerî'

 

Yildize qiseykerdişê xo yê peyênan de bale ante weçînayîşê herêmî yê 2019î ser û wina qedênaye: “Şar vera qayûman de bi hêrsin o. Qayûman meşru nêvînenî. Cayê ke ma şonê zîyaretê înan de şar ma rê vano ‘Wexto ke rexneyê ma bibayêne ma bi asanî şîyêne şaredarî. La nika şaredarî binê ablûqaya polîsan de ya. Ma wazenê kesê ke ma weçînayî bêrî weçînayîş.’ Vera polîtîkayanê zextî de hêrs û reaksîyonêk gird estî. Şarê kurd do îradeya xo teslîmê qayûmanê nêkero û nêeşkenî vernîya îradeya kurdan bigîrî. Ma do cayê ke mendî ra dewam bikerî. Ma selahîyet şarê Payîzavaye girewt, ma karê xo ser de yî.”