Tolîn Muhemed

 

ŞEHBA - Cinîyê Efrînî yê ke binê zehmetîyê pîl de Şehba de bi ca bî û têkoşînê cuyayîşî danê mesajê dewamê xoverdayîşî dayî û vatî: "Vera îşgalkerdişî ma do têkoşîn û adetê xo her gam gane verdê."

 

Cinîyê Efrînî yê ke seba hêrişê dewleta tirk û komê girêdayê aye Kampa Berxwedanî yê Şehba de bi ca bîyê pêwa heme zehmetîyan adetê xo dewam kenê. Cinîyê Efrînî vanê: "Çi beno wa bibo ma do qetî fek adetê xo vera nêdanê û ma do vera dişminê merdimayî her wext vinderê."

 

'Ma kulturê xo yê pî û dayîkanê xo dewam kenê'

 

Cinîya bi nameyê Fatmê Şêx Muse dîyar kerde ke ê wexto ke yenê têhet hîkayeyê ke ma dayîk û pîyê ma ra mendê vanê: "Pêwa heme koçberî û tedayan ma reyna adetê xo ra fek vera nêdanê. Wexto ke ma yenê têhet, ma hîkayeyê ke kultur,  huner û tarîxê ma de nimte yo hem domananê xo hem zî yewbînan ra vanê ke kulturê hîkayeyan bireso neslê bînan zî. Ma qetî hêvîya xo vindî nêkenê. Senîn ma nika hîkayeyê xo vanê, ma a bawerî de yê ke ma do rojêke ageyrê Efrîn û uca de zî hîkayeyê xo vajê.

 

'Adetê ma yê Efrînî dewam keno'

 

Cinîya bi nameyê Roşîn Îbrahîme da zanayîş ke Efrîn de adetê înan ê komelî mîyanê aştîye de dewam keno û wina va: "Verê ke dewleta tirk û çeteyê aye Efrîn îşgal bikerê uca de mîyanê têduştî û azadî de ma adetê xo dayne cuyayîş. Ma ameyne têhet û ma kom bîne, ma werdê xo yê adetî viraştêne û dima ra cinîyê ke emrê înan pîl bi hîkaye qalî kerdêne. Dima ra zî mîyanê germbîyayîş û zerrîyake weş kilamî ameyne vatiş. Ma nika zî hewl danê ke adetanê xo mîyanê şertê xidar de dewam bikerê."

 

'Mîyanê cuyake hempar de nanê tewqe viraştêne'

 

Heto bîn ra cinîya bi nameyê Nedîme Ezîze zî wina va: "Verê ke dewleta tirkan û çeteyê aye hêrişê Efrînî bikerê, ma uca de kom bîne û mîyanê cuyake hempar de ma nanê tewqe viraştêne. Seba viraştişê nanê tewqe ma kilam û hîkaye vatêne. Ma Efrîn bi vengê kilam û hîkayeyê kan xemilnayne. Efrîn ca û warê kal û pîranê ma yo. Ma do Efrîn îşgalkerdoxan rê nêverdê. Vera îşgalkerdişî û tedayan ma do têkoşîn û adetê xo her wext gane verdê. Se beno wa bibo ma do qetî fek adetê xo ra vera nêdê û ma do vera dişminê merdimayî her wext vinderê."