WAN - Cinîyê Wanî dîyar kerdî dimayê ke qayûm tayînê şaredarîyê înan bîyo, şaredarî êdî ê şarî nîyê û va 31ê Adara 2019an pawenê. Cinîyan va vernê de şaredarî bi dêsê beton dorpêç kerdê û va tarîxê xelasîya înan nêzdî yo.

 

YSKî rojnameyê fermî de îlan kerd ke do weçînayîşê mintiqa 31ê Adara 2019an de bêro kerdene. dimayê nê her kesî verê xo da weçînayîşan. DBP yo ke hema hema heme şaredarîyê ci qayûm tayîn kerdî, vano do şaredarîyê xo reyna bigîrê. Wan de zî 14 şaredarîyan 12 şaredarî qayûm ci amebi tayînkerdiş. Cinîyan reaksîyon vera na rewşe dayî û rojeva weçînayîşî şîrove kerdî.

 

Cinîya bi nameyê Kiymet Derelîya Xaçortî yê Îpekyolê Wanî cuyena, vera çinkerdişê îradeyê înan reaksîyonê xo ardî ziwanû wina va: "Kesê ke ma nas nêkerdêne ardî şaredarîyê ma. Şaredarîyê ma ewil bi betonan dorpêç kerdî. Polîs, TOMA, wesayîtê zirxî dayî verê berî. Ma nêeşkenê tu problemanê xo bîyarê ziwan."

 

'Ê reyna qayûm tayîn bikerê zî ma do veng bidê îradeyê xo'

 

Selma Gazîogluya ke eynî taxe de nişnena ro wina va: "Ma qayûman nêwazenê. Bi 3 serrî yo taxe her wext binê tedayê polîsan de ya. Şîdet cinî û domanan rê kenê. Ma wazenê serê herra xo de azad bicuyê. Nê zî seba ma zêde vînenê. Reyna  qayûm tayîn bikerê zî ma do veng bidê îradeyê xo."

 

Turkan Gura ke zî da zanayîş ke roja ke qayûm ameyo tayînkerdiş heta nika tu xizmet seba înan nêameyo kerdene û heto bîn ra zî ê tarîxê ke qayûm ra xelas bibê pawenê.