ŞIRNEX - Sakîne Durmîşa ke Cizîr de cuya xo vindî kerde û hîrê serrî yo cenazeya aye nîna vînayîş, vejîya meydan ke seba muracatê girewtişê cenaza û cigêrayîşê nimûneyê gonî bêtaqîbî ameyo dayîş. Zabitnameyê seba dewa ameyo amedekerdene de zî wina yeno vatiş: "Hetê fîzîkî de şibyena. La bi hewayêke zelal tespîtkirin mumkin nîyo."

 

Qedexeyê tebervejîyayîşê kuçeyan yê Cizîrî de pêrodayîşê ke ameyî cuyayîş de bi seyan kesî cuya xo vindî kerd. Hema 14 cenazeyî vindî yê. Pêwa heme hewldayîşî keyeyan hema cenazeyî nêameyî vînayîş. Yew nê cenazeyan ra zî cenazeya Sakîne Durmîş a. Seba cenazeyê Sakîneye bêra vînayîş û vejîya meydan ke qerarê bêtaqîbkerdişî dayê ser ê dewa. Dosya ke îfadeyê hîrê şahidê nimte estê de dozgerîye va 'xêrcê şibnayîşî tespîtêke zelal çin o’ û qerarê bêtaqîbkerdişî da.

 

Vatî 'nimûneyê DNAyî ci nîno' û dewa padayî

 

Keyeyê Sakîneye çapemenî ra musa ke Sakîneye Cizîrî de cuya xo vinî kerda. Keye Wan ra ame Cizîr û seba DNAyî gonî dayî. Gonî 2ê Tebaxa 2016an de amî dayîş û bi aşman netîceyê ci nêame. 3 aşmî ra dima 24ê teşrîna peyêne 2016an de qerarêke ‘cenazeyêke goreyê nimûneyê gonî nêameyo vînayene' ame dayîş û qerarê bêtaqîbkerdişî dayî.