STENBOL - Çalakîya Dayîkê Şemeyan hewteyo 709. xo pey de verdaye. Tewr peynî ronîştişê dayîkan amebi qedexe kerdene. Derheqê babete de dayîkan ra Hatîce Toramana ke 27 serrî ya cigêrayîşî edaletî domnena qisey kerde. Hatîceye dîyar kerde ke lajê aye Huseyîn 1991î de ame vînîkerdiş û her çiqas ke astengî û qedexe bibî zî aye tewrê çalakîye bena.

 

Çalakîya Dayîkê Şemeyan hewteyo 709. xo pey de verdaye. Dayîkê Şeme ke serra 1995î ra nata Rasteyê Galatasarayî de çalakîye virazenî û aqubetê merdimanê xo yê vînîbîyayeyan pers kenî her hewte roja şeme saet 12.00î de Rasteyê Galatasarayî yê Taksîmî de arê benî û edalet wazenî. Dayîkê Şeme ke serranê 90î ra nata çalakîyan virazenî raştê kerdişanê tewir bi tewiran yenî. Tewr peynî ronîştişê dayîkan amebi qedexe kerdene. Derheqê babete de dayîkan ra Hatîce Toramana ke 27 serrî ya cigêrayîşî edaletî domnena qisey kerde. Hatîce dîyar kerde ke lajê aye Huseyîn 1991î de ame vînîkerdiş û her çiqas ke astengî û qedexe bibî zî aye tewrê çalakîye bena. Hatîceye daye zanayene ke lajê aye pawitoxê heqê merdiman bî û qala hîkayeya lajê xo kerde.

 

Cîran, esnaf û sewbîna şahidê hedîseyan estî

 

Hatîceye qiseykerdişê xo de wina va: “Lajê mi bi wesayîtêk Torosî ameyo tepiştiş. Polîsî her roje eştêne keyeyê ma ser. Polîsê qereqolê Çinarî ra ameyêne û sivîl bî. Cîran, esnaf û sewbîna şahidê hedîseyan estî. La ma nêeşkayî yew daxî îspat bikerî. Mi polîsêk rê va ‘Ti senî polîs î. Merdiman remnenî. Ti qey wayîr nêvejîyenî.’ O zî va ‘La ez se bikera. Ma polîs bi polîsî eşkeno çîyêk bikero.’ kasetê.’ Kasetêk yê vengî keye ra berdî. Îsmet Sezgîn destê xo da piştîya mi va ‘Şo kêna mi. Lajê to cayêk baş de yo.”

 

27 serrî yo ke ne lajê mi û ne zî kerdoxî ameyî dîyiş

 

Hatîceye va ‘ça lajê mi cayêk baş de bî. 27 serrî yo ke ne lajê mi û ne zî kerdoxî ameyî dîyiş. Sewbîna têkoşînê ma yê 27 serran qedîyeno û kesêk bengê xo nêkeno.’

 

Ma bi 7 kesan dest pêkerde û ma resayî bi hezaran

Hatîceye dewamê qalîkerdişê xo de dîyar kerde ke ê seba merdimanê xo yê vînîbîyayêyan çalakîyê tewir bi tewiran pê ardî û wina va: “Nê çalakîyan ra yew zî greva vêşanîye ya aşmêkî ya. Badê na çalakîye ma tewrê 7 dayîkan Rasteyê Galatasarayî yê Taksîmî de çalakîya roniştişî pê ardî. Ma bi 7 kesan dest pêkerde û ma resayî bi hezaran.”

 

'Dewlete 200 dayîkan ra tersena'

 

Hatîceye qala qedexekerdişê çalakîye kerde û va: “Dewlete 200 dayîkan ra tersena. Çîyê ke dewlete bi nêkerde nêmende. Heme çîyan kerde. Lajê mi senî qetil kerdî? ez hêrs nîya, bi kînin a. dayîkê Şeme raştê hêrişan yenî. Ma ra tersenî. Talebê ma dîyişê hesteyê domananê ma û muhakemekerdişê kerdoxan î”