AMED/ÊLIH - Çarçiwaya operasyonanê qirkerdişê sîyasîyî de mîyanê înan de hemserekê şaredarîya DBPyî ya Êlîhî Sabrî Ozdemîr zî tede xeylî kesî gîrîyayî binê nezaretî. Sewbîna Hêzê dewleta tirkî ke Amed de zî operasyonê leşkerî virazenî û eştî 107 keyeyan ser. Qezayanê Licê, Karaz, Hezro û 76 dew û mezrayanê pabesteyê Amedî de bi ‘ qedexeyê tebervejîyayîşî‘ 29ê Teşrîna verêne de operasyon amebi destpêkerdene.

 

Bitaybetî zî herêma bejike yê başûrê Licê de bi xeylî leşkeran, yewîyanê taybetan û wesayîtanê zirxinan operasyonêko gird yeno viraştene. Qedexeyê teberî saetanê şewe yê 31ê Teşrîna verêne de ame wedartene. Bado zî hêzanê dewleta tirkî eşt 107 keyeyan ser û ewnîyayî GBTyê (zanayîşo pêroyî) hemwelatijan ra.

 

Deeştişê Êlihî ser

 

Hemserekê şaredarîya Êlîhî Sabrî Ozdemîrî gîrîya

Merkezê Êlîhî û qezaya ci Gercews zî tede sereştişanê ke vizêr saetanê sibayî de ame kerdene de 10 ra vêşêr kesî gîrîyayî binê nezaretî û ame vatene ke operasyon hewna dewam keno. Operasyon de erzîya keyeyê hemserekê şaredarîya Êlîhî yê Partîya Herêmê Demokratîke (DBP) Sabrî Ozdemîro ke gure ra amebi girewtene ser. Pîya bi Ozdemîrî xeylî kesî gîrîyayî binê nezaretî.