MÊRDÎN - Hemsereka Partîya Demokratîke ya Şaran (HDP) ya Mêrdînî Eylem Amake derheqê xerîteya rayîrî ya weçînayîşê herêmî ser o qisey kerde. Eyleme daye zanayene ke ê do dew bi dew, tax bi tax, kuçe bi kuçe û keye bi keye xebatan bikerî û HDP weçînayîşê herêmî ra amade yo.

 

Hemsereka Partîya Demokratîke ya Şaran (HDP) ya Mêrdînî Eylem Amake derheqê xerîteya rayîrî ya weçînayîşê herêmî ser o qisey kerde. Eyleme daye zanayene ke ê do dew bi dew, tax bi tax, kuçe bi kuçe û keye bi keye xebatan bikerî û HDP weçînayîşê herêmî ra amade yo.

 

Eyleme destpêkê qiseykerdişê xo de arde vîr ke çend serrî verê cû zî weçînayîş amebî kerdene û netîceyê weçînayîşî de 10 şaredarîyê qezaya Mêrdînî û Şaredarîya Girdî ya Mêrdînî qezenc kerdbî û wina va: “Wexto ke ma weçînayîş qezenc kerde, tena hedefêk ma estbî û o zî xizmet bî. Ma heta tayînkerdişê qayûman fek xizmetdayîşî ra vera nêda. Dewlete bi rayîrê qayûman dest ronaye qezenc û îradeya şar ser. Heme embazê ma yê ke xebetîyayêne kar ra ameyî eştiş. Ma prosesê xo de xeylê komeleyan akerde. La qayûm heme komeleyan pada. Herinda komeleyan cinîyan de sewbîna komeleyêk akerdî û camêrdêk tayîrê serektîya komele kerdî. Dest ronayî heme proje û plananê ma ser û seke yê înan î nîşan dayî.”

 

'Qayûm sey xebityeno ramojneno la nêxebityeno'

 

Eyleme dewamê qiseykerdişê xo de dîyar kerde ke qayûm dest rona Şaredarîya DBPyî ser û xo seke xebetîyeno dano nîşandayîş û wina domnaye: “Hetê gorselî de şar xapêneno. Prosesê ma de şar bi asanî ameyêne şaredarî û şîyêne. La nika badê cigêrayîşê polîsan derbazê şaredarî benî. Hemwelatî na rewşe ra xeylê aciz î. Xeylê esnafî qayûm vera dikananê xo padayî. Qayûm karê pakî nêkeno û cok ra boya xirab kewta Mêrdînî.”

 

'HDP xerîteya rayîrî ya hîra amade kerdo'

 

Eyleme qiseykerdişê xo yê peyênan de bale ante weçînayîşê herêmî ser û wina qedênaye: “Vernîya ma de weçînayîşê herêmî esto. Ma do weçînayîş de qezenc bikerî. Ma do seba şarê xo şew û roje xebetîyenî. Ma do dew bi dew, tax bi tax, kuçe bi kuçe û keye bi keye xebatan bikerî. HDP weçînayîşê herêmî ra amade yo. No weçînayîş de xebatê ma hîna xurt î. Ma çarçeweya programê xo de xebetîyenî. Ma seba xebatanê esasî xerîteya rayîr amade kerda. Ma komşsyonan amade kerdî û tewrê komeleyan xebetîyenî. Tewr zêde zî programê cinîyan yenî newekerdiş. HDP xerîteya xebatêka xurt amade kerda.”

 

Eyleme seba weçînayîşê herêmî veng daye heme kesan ke tewrê xebatanê weçînayîşî bibî û pîya xebatan bimeşnî. Eke ma xebatan xurt bikerî do weçînayîş de serkewtiş yê ma bibo. HDP weçînayîşê herêmî rê amade yo.