Lîlav Elî

 

ŞEHBA - Domana astengdara 12 serrî ke seba hêrişê dewleta tirk û komê girêdayê aye pêwa keyeyê xo Şehba de bi ca bîya û bi tevger û ewnîyayîşê xo dîyar kena ke aye xeylê binê tesîrê şerî de menda û xeylê xeyalê aye ameyî talankerdiş. 

 

Dimayê hêrişê dewleta tirk û komê girêdayê aye yê serê Efrînî bi hezaran kes mecbûr mendî ke koçê Şehbayî bikerê. Domana astengdara bi nameyê Hêvî Alo ke 12 serrî ya û dewa Gobekî yê Qezaya Mabeta ya Efrînî ra ya mecbûr mende ke bi keyeyê xo dir Şehba de bi ca biba. Maya Hêvîye Narîman Hemoye arde ziwan ke wexto ke dewleta tirkî bomba serê Efrînî de varayne, Hêvîye sereyê xo girewtêne û qîrayne û xeylê xeyalê înan û domananê înan bi xedar ameyê talankerdiş.

 

'Ameyoxê domananê ma kerdî xetere'

 

Maya Hêvîye Narîman Hemo arde ziwan ke înan zaf dej û zehmetî antê û wina va: "Di domanê mi estê. Yew 5 serre yo a bîne zî Hêvî ya û 12 serrî ya. Hêvî wexto ke Homa aye da astengdar bî. Seba ke kêna mi baş biba, zaf doktaran de geyrnayî la baş nêbî. Wexto ke Erdogan û çeteyê ci hêrişê Efrînî kerdî rewşa Hêvîye tewr xira bî. Tersêke kewt zerrîya aye. Nika hema zî binê tesîrê vengê tank û topan de ya. Seba asayîşî wexto ke ma Efrîn ra vejîyayî, verê ma şî qezaya Eşrefîye. Seba ke wesayît kêm bî, mi Hêvî kerde pişta xo. Dima ra ma derbazê dewa Wehşiyî yê Kantonê Şehbayî bî. Heta ke ma ameyî Şehba ma xeylê dej û zehmetî ant. Hêvîye wexto ke bêra îhmalkerdiş rew nêweş kona. Seba ke dewleta tirk û çeteyê aye Efrîn dagir kerdî, ameyoxê domananê ma kerdî xetere."

 

'Ma kampe de tewr zêde zehmetî ancenê'

 

Heto bîn ra Narîmane arde ziwan ke seba Hêvî astengdar a aye kampe de tewr zêde zehmetî ancen û wina va: "Seba ke cayê bano dûr o heta ke ez Hêvîye bena seba sereyê aye bişoyî ez zaf zehmetî ancena. Kampe de ma zaf zehmetî ancenê. Seba mewsîmê zimistanî zî domanî tewr zêde nêweş konê. Ma tîya mîyanê heme zehmetîyan de tekoşînê cuye danê. Ganî dinya vengê ma bieşnawa û piştdayîş bida nê xoverdayîşê ma."