MERKEZÊ XEBERAN - Vejîya raşte ke nêweşîya felcî ke mîyanê sebebê mergî de rêza hêrin de ca gêna kesê ke cixara ancenî de hîna zêde vejîyena raşte. Pisporî dayî zanayene ke kesê cixara veradayî zî heta 5 serran rîska felcî cuyenî.

 

Tirkîya de her serre nizdîyê 200 hezar hedîseyê felcî yenî dîyiş û nêweşîya felcî mîyanê sebebê mergî de rêza hêrin de ca gêna. Nêweşî badê xetemîyayîşê damarê mezgî xo dana teber û merdim nêeşkeno têbigêro û tay taybetîyê xo vînî keno. No felcê mezgî yo. Prof. Dr. Îbrahîm Halîl Kurtî bi wesîleya 29ê Teşrîna verêne Roja Felcî ya Cîhane qisey kerd û derheqê nêweşîye de malumatê muhîman da. Îbrahîmî qiseykerdişê xo de bale ant faktorê rîskî û wina va: “Kalbîyayîş, pîrbîyayîş, zayend, tansîyono berz, dîyabet, kolestrolo berz, hîkayeya keye, cuya bêtêgêrayîş, zêdebîyayîşê kîlo, antişê cixara û neweşîya zerrî yî. Kesê ke felc benî ra 4 ra 3ê ci nizdîyê emrê 60î yî. Rîskê felcî badê 60 serrî her 10 serran de 2 qat zêde beno. Nêweşîye camêrdê 55 serrî de goreyê cinîyan hîna zêde yena dîyişe.”

 

Kesê ke cixara ancenî de zêde yena dîyene

 

Îbrahîmî qiseykerdişê xo yê peyênan de da zanayene ke basincê gonîya berz, kolestrolo berz û cixara sebebê tewr zêde yê nêweşîya felcî yî û va: “Emrê zêde de rîskê atrîyal fîbrîlasyon zêde beno. Nêweşîya felcî kesê ke cixara ancenî de zêde yena dîyene. Kesê ke cixara ancenî de rîskê felcî 5 qat hîna zêdeyo.”