ŞIRNEX - Selamet Mata ke nêweşa tansîyonê hîperî ya û hepisxaneyê Tîpê T yê Şirnexî de 4 aşmî tepişnaye mende û roniştişê yewin de amî tahliyekerdiş, dîyar kerde ke seba dermanê aye nêameyê dayîş serê hişê xo ra şîya û wina va: "Înan mi wedarna nêweşxane. La nêweşxane de vera dermananê mi hîn dermanê bînan dayî. Ganî şar nê tedatan bivînê û vera çîyê ke  yenê cuyayîş bêveng nêmanê."

 

Selamet Mata 56 serrî Cizîr de 5ê Temmuze de eştişê keyî ser amî tepiştiş û tewqîfkerdiş. Selamate rojê vîyarte de roniştişê yewin de bi şertê kontrolê edlî ame tahliyekerdiş. Selamete problemê aye weşî estê zor û zehmetîyê hepisxane de cuyaya qalî kerde.

 

Selamete arde ziwan ke 3 rojan tepişnaye mende û wina va: "Wexto ke newe şîya vatî ‘ti şina verê kesê bi het ya bêhet'. Bi tirkî vatî. Mi zî va wa bi kurdî vajê. Bi kurdî vatî. Mi zî va bi kam sucî mi tepişnayê mi bieşrawê uca'. La gardîyanan zî va, ‘sîyasî tîya çin ê, teror estê'. Dima ra zî va ‘xoz, şeytan’.”

 

'15 rojan dermanê mi nêdayî'

 

Selamete da zanayîş ke seba dermanê aye nêdayê rewşa aye giran bîya û wina va: "Mi wedarnayî nêweşxane. Destêke mi bi kelepçe bi nivîne girêdayî. Desto bîn zî serûm dayî piro. Hîpertansiyonê mi esta. Hepisxane de derman nêdayî. Mi waştişname nuşt. La waştişname wextê roşanî de nêşi. 15 rojan dermanê mi nêdayî. Ez xo ra şîya. 4 rojan nêweşxane de menda."

 

'No zulmî qebûl mekerê'

 

Selamete tewr peyîn qiseykerdişê xo de seba peynîkerdişê tedayan vengdayîşê têkoşînê hempar her kesî kerde û va wa êdî her kes na rewşe bivînê û va: "Wa hepisxaneyan êdî bivînê. Verê ma de di domanê qij zî estbî. Heta şan de bermayne. Pêkayan nêdayne. Ez veng dana Kurdan wa êdî no zulmî qebûl nêkerê.”