HESEKÊ - Cinîyê ke eslê xo ra erebî reaksîyon nîşan dayî hêrişan û dagirkerîya dewleta tirkî ya serê Efrînî û dîyar kerdî ke tena hêzê cinîyan eşkeno Efrînî azad bikero.

 

Badê ke dewleta tirkî dest bi hêrişê herra Efrînî kerde şarê herême û bi hezaran kesî mecbur mendî ke koçê cayê cîya cîyayan bikerî. Cinîyê efrînijî reaksîyon nîşan dayî bêvengîya vera hêrişan û koçkerdişan û dîyar kerdî ke do bi îrade û hêzê cinîyan Efrîn destê dagirkeran ra bêro rizgarkerdiş. Babete ser o cinîyan ra Sena Casim û Yisra Îsaye qisey kerdî.

 

‘Îqtîdar hêzê cinîyan ra terseno’

 

Sena Casime qiseykerdişê xo de bale ante hêzê cinîyan ser û wina va: “Îqtîdar hêzê cinîyan ra terseno. Cok ra wexto ke hêriş keno sere de cinîyan hedef gêno. Dewleta tirkî û çeteyê aye wexto ke hêrişê Efrînî kerdî, destpêk de cinîyan kerdî hedef ke hêzê înan bişiknî. Cinîyî şorişê Rojawanî de hêzê xo nîşan dayî. Ez veng dana heme cinîyan ke seba rizgarkerdişê Efrînî têkoşîn bidî. Ma do heta rizgarîya Efrînî payan ser de bibî.”

 

‘Hêrişan ra Dewletê Mîyanneteweyî berpirsîyar û sucdar î’

 

Cinîya binameyê Yisra Îsaye zî qiseykerdişê xo de hêrişê ke hetê dewleta dagirker ya tirkî ra yenî kerdiş şermizar kerde û va: “Pêroyê darê zeytunan bi keda şarê Erfînî ameyî awdayîş. Keda merdiman wayîrê erjî ya. Dewleta tirkî keda merdiman pelçiqnena û daran veşênena. Ma nê hêrişan de komeleyê heqê merdiman û Dewletê Mîyanneteweyî sucdar kenî. Çimkî vera hende çîyan de bêveng manenî. Ma do bi yewîya kurd û hêzê kurdan wayîrê Efrînî bivejî û dagirkeran ra xelas bikerî.”