AMED - Bahar Karakaş Uluga KESKije dîyar kerde ke ganî N.A ke seba forma aye ê wendegehî çinbî wendegehê mîyanên yê Mesut Yilmazê Baglarî ra amî eştiş û keyeyê aye rê uzr bêro waştiş û wina va: "Na hedîse ra îqtîdaro bîyaye û sîstemê perwerdeyî ke awan kerdo berpirsîyar o. Waştişê mi o yo ke derheqê îdareyê wendegehî de cezaya cêgirayîşî bêro destpêkerdiş."

 

Domana bi nameyê N.A ke şina sinifa 5an yê Wendegehê Mîyanên ê Mesut Yilmazî hetê hetkarê mudirî ra bi sebebê formaya aye wendegehî çin a, verê embazanê aye de amîbî qijvistiş û wendegehî ra amîbî eştiş. Rojê vîyarte de xebera aye ajansê ma de vejîya rojeve. Seba pîyê N.A nêxebityeno îmkanê înan çinbi ke forma bigîrê û helwestê îdareyê wendegehî zî rastê reaksîyonê raya pêroyî amebi.

 

Sekretera Cinîyan ê BTSî  û Verfeka Demî yê Platformê KESKî yê Amedî Bahar Karakaş Uluge derheqê babete de qisey kerde û wina va: "Ez hedîse raya pêroyî ra musa ya. Ez zî maya di domanan a. Pêwa ke ez û mêrdeyê xo xebityenê zî ma nêeşkenê şîyayeyê domanan vejê. Pîyo ke seba krîzî kar ra vejîyayo, do senîn şîyayeyê domanan temam bikero. No hal nîno qebulkerdiş."

 

'Îqtîdar hedîseyê wina de bi tesîr o'

 

Bahare da zanayîş ke heta no halê krîzî dewam bikero do caardişê wina dewam bikerê û va seba nê hedîseyan endîşeyîn ê û  wina va: "Zîhnîyetê îqtîdarî ê bîyaye û sîstemê perwerdî hedîseyê wina de zemîn amade kenê. Labelê krîzê ekonomî yê reel hetê şarî ra yeno hîskerdiş û ma rastê xeberê winasî yenê. Na hedîseya Amedî, hedîseya  Kocaelî ard vîrê merdiman. Wexto ke mi na xebere wende mi va ‘înşallah rewşêke wina nêra cuyayîş'. Semedo ke na rewşe serê keyeyî û domane de tesîrêke pîl bikero."

 

'Ganî tedbîrê ceza bêrê caardiş'

 

Bahare tewr peyîn qiseykerdişê xo de va ganî derheqê îdareyê wendegehî de tedbîrê ceza bêrê girewtiş û wina va: "Mamosteyê sinife zî tede, ganî heme îdarekarê wendegehî û berpisyarî derheqê hedîse de îzahatêke bidê. Ganî îdarekarê wendegehî N.A û keyeyê aye ra uzr biwazê. Seba ke vernî hedîseyê wina bêrê girewtiş, ganî ceza bêra dayîş. Vera hedîseyê wina de ganî her kes bi hîsgêr bo û raya pêroyî bêro awankerdiş."