AYDIN - Îdarekara AYÇEPî Gonul Hastaoglu dîyar kerde ke JESê Aydinî problemê weşîye rê rayîr akeno û va coka êdî şar destûr nêdano. Gonule wina va: "Dînar de serê Parka Suçikan de seba ke santralê termîkî yenê awankerdiş, ma zanayîş girewt ke do awe biherikyo û Menderes zî do awe ci ziwa bibo."

 

Santralê Enerjîyê Jeotermal (JES) ke 7 serrî verê Aydin de ameyî destpêkerdiş, bajar de problemê cidî yê weşîye rê û derûdorî rê rayîr akeno. Goreyê  cêgirayîşê Platformê Derûdorê yê Aydinî (AYÇEP) va bi zeytûnan dir sera 50, bi încîran dir sera 30 û bi kestaneyan dir zî sera 30 berardiş kêm bîyo. Goreyê zanayîşê Odeyê Zîraatî yê Aydinî zî genimo ke berardişê ci 750 hezar kîlo bi emsar vejîyayo 350-400 hezar kîlo.

 

Îdarekara AYÇEPî ra Gonul Hastaoglu va gazê sulfurî xoza rê vila beno û wina va: "Gerek eşte nêro vilakerdiş ke awe lêşin nêbo. Labelê awe, çem û Menderes yenê lêşinkerdiş. Aydin de dayeyê rîşa merdimwere zêde bîya. Ma rastê metalê giran yê radon, arsenîk û civa yenê. Peynîya 41 rojî de derûdorî vila beno û xoza zirarêke pîl vînena.

 

'Kizilcakoy de cinî xo ver danê'

 

Gonule da zanayîş ke şîrket îdia keno ke JES bi feydeyîn o û warê îstîhdamî awan keno û wina va: "Emîrdogan de şar destûr nêdano. Kizilcakoy zî cinî vera projeyê 120 bîran xo ver danê. Cinîyê dewe vanê ê nêwazenê domanê înan jehrî bibê û nêwazenê herra xo înan rê verdê."

 

Gonule tewr peyîn qiseykerdişê xo de da zanayîş ke seba eşteyê sanayîyê Uşak û Denîzlî Çemê Menderes xora lêşin bîne û nika zî berardişê JESî zaf lêşin beno û mintiqaya Soke Kafa de zî bi tonan maseyî merdê.