Duygu Cînîvîz

 

EDENE - Hemwelatîyê ke Edene de yê dîyar kerdî ke seba polîtîkayê ekonomîyê hukmatî êdî nêeşkenê debara xo bikerê û vatî: "Wa hukmat û çapemenî zûran nêkerê û nêvajê ‘yê ke stok kenê krîz vejenê'. Wa ageyrê bazaran halê ma biewnê."

 

Hemwelatiyê ke vejîyayî Bazarê Îne ya taxa Gulbahçeyê Seyhanî ê Edene nnêrazîbîyayîşê xo yê vera krîzî ardî ziwan. Rewşa welatî û esnafê bazarê rewşa tewr akerde yê krîzî vejeno meydan.

 

Emîne Kaya  dîyar kerde ke çîyêk nêeşkeya bigîra û wina va: "Ez veng dana kesê ke vanê krîz çin o. Wa bêrê bazaran ra biewnê krîz esto ya nê? Feqîrî nêeşkenê çîyêk bigîrê. Esnaf nêeşkeno erjan bigîro û biroşo şarî rê. Ma çîyêke wina beno? Verê ez bi 30 TL ameyne bazar û mi her çî girewtêne. Nika bi 100 TL yena nêeşkena çîyêke bigîrî. Qîm nêkeno. Ma êdî her çî wina kêm xebitnenê. Ez nê zor û zehmetîyan de 3 domanan dana wendiş."

 

'Seba krîzî ma nêeşkenê veyve bikerê'

 

Yildiz Bakire zî reaksîyon vera xeberanê çapemenîye da û va: "Na dewlete vera şarê xo nêheqî kena. Heme berardişê no welatî eşrawenê teber. Seba krîzî şar û esnaf yenê rî yewbînan. Ma her wext seba vayîye esnafan dir munaqeşe kenê. Ma hesabê 3-5 kuruşan kenê. Maeşê asgarî bi deyn qedêno. Wa nêvajê 'yê ke stok kenê krîz vejenê'. Êdî kesêke nêeşkeno debara keyeyê xo bikero. Ma çend kes xebityenê la debara ma nêbena. Pîyaz, kartol, firingî her çî zaf vayo. Veyve xo zî ma seba krîzî taloqê aşma teşrîna peyêne kerde."

 

Saîdeye zî arde ziwan ke seba polîtîkayê ekonomî yê hukmatî ameyê sewîyeya vêşanî û va: "Ez bi 100 TL ameya bazar.  Ez çenteyê xo ewnîyena di kîloyê firingiyê pelçiqnaye. Ez hukmat ra razî nîya. Krîzêke pîl esto. Ma êdî nêzanê senîn debara xo bikerê. Heme çî vay bîyo."

 

Melek Bîlale zî bi 20 serre yo esnafî kena wina va: "Seba krîzî ma êdî vanê tezgahê xo anêkerê. Seba krîzî karê ma nêbeno. Muşterî seba vayîyan nêrazîbîyayîşê xo mojnenê ra. Ma deterjanan roşenê. Seba înan zî sera se zam ame. Bi 20 serrî yo esnafî kena reya ewil rewşêke wina xirab vînena. Ma vanê tezgehan bigîrê la ma do vêşanî ra bimrê."