Safiye Alagaş

 

STENBOL - Emîne Kayaya ke 22 serrî verê pî û dedê xo vindî kerde û her hewte Meydanê Galatasarayî de edalet geyrana bale ante serê tedayê çalakîya dayîkê şemeyî ser û va hewl yeno dayîş çîyê ke ameyê cuyayîş bi înan bidê xovîrrakerdiş û va ne yew o û ne zî di yo. Do kam ci pak bikerê?

 

Serra 1996an de Guçlukonakê Şirnexî de Ahmet Kaya û birayê ey Halît Kaya bi 11 kesî dir ame tepiştiş û dima ra zanayîş înan ra nêame girewtiş. Kêna Ahmet Kaya, Emîne Kaya bi 22 serrî yo pîyê xo geyrena û bi 20 serre yo çalakîya Dayîkê Şemeyî de ca gêna.

 

Emîneye wina va: "Seba ke ma Kurd bî ma nê çî cuyayî. Ma her hewte tîya niştî ro. Cuya ma Galatasaray de derbaz bi. Tîya seba ma girîng o." Emîneye reaksîyon vera qedexekerdişê Meydanê Galatasarayî zî mojna ra û arde ziwan ke dewlete wazena merdimê vindîbîyayeyan bi tarîtî bifetisîno.

 

'Wazenê hişê ma ra bidê pakkerdiş'

 

Emîneye qiseykerdişê xo wina dewam kerde: "Çalakîyê ma hedîseyê ke ameyê cuyayîş teze verdena. No semed ra wazenê hişê ma ra pak bikerê. La ne yew, ne di û ne zî hîrê. Bi seyan vindîbîyaye estê. Do kam ci bidî xovîrrakerdiş. Ma do têkoşînê xo her ca de dewam bikerê. Eke ma kesêke zî bimanê do têkoşîn dewam bikero. Hewteyê 700in de mudaxale kerdî. Fotografê pî û dedê mi girewtî. Mi dayîkêke 80 serrî ancax destê înan ra girewte."

 

Emîneye da zanayîş ke pêwa heme çî do têkoşînê xo dewam bikera û wina va: "Ma do hesabê vindîbîyayeyanê xo pers bikerê. Ganêke esto o zî kenê vînî. Ma her şeme şinê û fotografanê înan gênê û aqûbetê înan pers kenê.  Ma xêrcê ci dewlete ra çîyêk bîn pers nêkerd. Kiştoxî kuçeyan de geyrenê, verê çimanêma de yê. Hema wa yew bitepişnayne, ceza bidayne. Yê sey Tansu Çîler, Mehmet  Agar kêfê xo de yê. Ma wazenê kiştoxê pî û dedê mi bêrê muhakemekerdiş. Ma kulmêke herre ke ma bieşkê şêrê serdayîşê înan wazenê."