EDENE - Hemverfeka HDKyî ya Edene Olcay Susgune reaksîyon nîşan daye tewqîfkerdişê siyasetmedar û rojnamegeran û dîyar kerde ke no operasyon girêdayeyê weçînayîşê herêmî yo û va: “Heta ke kesêk bimano têkoşînê ma do dewam bikero.”

 

Operasyonê sîyasî yê 9ê Teşrîna Verêne ke merkezê ci Amed pêro pîya 9 bajaran de ameyî viraştene. Bi fermanê Sergozgerîya Amedî polîsî 9ê Teşrîna Verêne de saetê serê sibayî de eştî keyeyê 151 rojnameger û siyasetmedaran ser. Mîyanê 141 kesê ke ameyî tepiştene de rojnameger Kîbriye Evren zî tede 25 kesî bi îdîayê ‘endamîya rêxistine’ ameyî tewqîfkerdiş. Sewbîna rojnameger Abdurrahman Gok, Lezgîn Akdenîz û Cîhan Olmezî zî tede 28 kesî zî serbest ameyî veradayene. Tay kesî zî bi şertê kontrolê edl, vera dîyayî. Çarçeweya operasyonî de pêro pîya 115 kesî serbest veradîyayî û 25 kesî zî ameyî tewqîfkerdiş. 

 

'Wazenî bitersnî'

 

Babete ser o Hemverfeka HDKyî ya Edene Olcay Susgune qisey kerde û reaksîyon nîşan daye tewqîfkerdişê siyasetmedar û rojnamegeran. Susgune qiseykerdişê xo de dîyar kerde ke no operasyon girêdayeyê weçînayîşê herêmî yo û va: “Heta ke kesêk bimano têkoşînê ma do dewam bikero. Faşîzmê AKP-MHPyî bi nizdîbîyayîşê weçînayîşê herêmî hêrişê HDPyî keno. Hedefê nê hêrişan astengkerdişê xebatê weçînayîşî yo. Bi îfadeyê şahidê nêmiteyan operasyon pê ame. Wazenî çimê siyasetmedaran bitersnî. Heta ke kesêk teber de bimano têkoşînê ma do dewam bikero.”

 

 ‘Têkoşînê topyekun’

 

Olcaye peynîya qiseykerdişê xo de veng daye têkoşînê vera hêrişan û dîyar kerde ke ganî heme karker û kedkarî têkoşînêk rêxistinkerde û topyekun bidî.