ÎZMÎR - Evrîm Maka ke mêrdeyê xo Mesut Makî Qetlîyamê 10 Teşrîna Verêne de raşteyê mîtîngî de vînî kerde, dîyar kerde ke çîyê ke badê qetlîyamî cuyayî birînê înan newe kerdî û wina va: “Na doze êdî sebebê cuya ma ya. Ma do vera heme çîyan de demokrasî bipawî. No 105 kesan rê deynê ma yo.”

 

10ê Teşrîna Verêne ya 2015î de kişta Garê Anqara de qetlîyamêk amebî viraştene û netîceyê qetlîyamî de 105 kesî merdbî û bi seyan kesî zî birîndar bîbî. Xeylê bajarê cîya cîyayan ra merdimî seba aştîwaştişî ameybî Anqara û raşteyê mîtîngî de hêrişê bombeyî pê amebî. No teqayîş bî qetlîyamê tewr pîlî yê Tirkîya. Badê teqayîşî polîsî hêrişê birîndaran kerdî û mudaxeleya gaz, nêameyîşê ambulans û destûr nêdayîşê şîyayîşê xebatkarê weşî vera xeylê birîndarî cayê hedîse de merdbî.

 

Qetlîyam de endamê Tarim Orkam-Senî Mesut Makî zî cuya xo vînî kerd. Cinîya Mesut Makî, Evrîm Make qetlîyam ra dima têkoşînê edalet, aştî û demokrasîye dana.

 

'Raşteyê şer de daxî no çî nîno kerdiş'

 

Evrîm Make qiseyekrdişê xo de qala aye roje kerde û wina va: “Mesut kurd bî. Ez zî tirk a. Ma zewecîya yî û kênayêk ma virazîya. Tena waştişêk ma estbî. Ma aramîya merdiman waştêne. Her Çiqas ke hedîse ra 3 serrî derbaz biba zî ma aye roje hema zî yena cuyayîş. Bombeyê gazî eştî birîndaran ser. Merdim senî wina keno? Raşteyê şer de daxî no çî nîno kerdiş. Mesut vînîkerdişê gonîya zêde vera merd. Mudaxale nêkerdî, eke mudaxale bibayene Mesut nêmerdêne.”

 

'Na rewşe ra dişmentî yena vatiş'

 

Evrîme qiseykerdişê xo yê peyênan de bale ante prosesê doze û va: “Polîsî nuqtayê cigêrayîşî de vindetişo ke erjê merdiman şiknenî nîşanê çalakgeran dayî. Ma salon de qatilan eyde eynî hewa tenefus kerde. Fotografê înan yê ke DAIŞî de antbî vejîyayî raşte. Derheqê înan de ti tehqîqat nêame akerdiş. Derheqê 9 keyeyan de tehqîqat akerdî. Na doze êdî sebebê cuya ma ya. Ma do vera heme çîyan de demokrasî bipawî. No 105  kesan rê deynê ma yo.”