STENBOL - Halîme T. dîyar kerde ke hepsîyê, hepisxaneyê Cinîyan ê Bakirkoyî de lazimiyê înan yê revîr, werd, lazimîyê şexsî û warê hempar bi ca nînê û va: "Hepsî wazenê vengê xo bid eşnawitiş. Wextê peyîn de teda zaf zêde bîyê."

 

Halîme T. ya rojê vîyarte de şî pêvînayîşê waya xo ya hepisxaneyê Tîpê L yê Bakirkoyî ê cinîyan, îhlalkerdişê heqan ke hepsî rî bi rî mendê qalî kerde.

 

Halîmeye arde ziwan ke roja pêvînayîşî bi hawayêke kêfî heta 11.00an ameyê vindarnayîş û va: "Îdareyê hepisxaneyî va telefon xira bîyê. Na mehne bî. Ganî vernî de biameyne tamîrkerdiş. Seba saeta pêvînayîşî yena zanayîş. Ma mudir dir pêvînayîş kerd. La va 'ma nêeşkenê çîyêke bikerê'. Ma zî va wa bibo pêvînayîşo akerde. Mudirî va 'qetî nêbeno'. Ma 3 saetî vindertî. Dima ra ma zere de dayî vindartiş. Ma 15.00an de vejîyayî pêvînayîş. Keyeyî acis bî. Keyeyê ke teberê bajar ra ameybî estbî."

 

'Cêgirayîş heta tacîzan şinê'

 

Halîmeye dewam de da zanayîş ke wextê cêgirayîş de rastê tedayan yenê û wina va: "Her wezîfedar cîya cîya cêgirayîş kenê. Cêgirayîşî heta tacîzan şinê. Mi reyke îtîraz kerd. Ez hewteyêke 10 rojan binê nê cêgirayîşî ra derbaz nêbîya. Pêvînayîşê akerde de keye û hepsîyan rê tedayê pîl kenê. Pêvînayîşan de bi vengêke berz ma her wext tacîz kenê. Hewl danê moral û motîvasyonan xira bikerê. Rayîr munaqeşan rê akenê."

 

'Doktor goreyê xo derman danê'

 

Halîmeye bale ante ser îhlalkerdişê hepsîyan û çîyê ke waya aye vatê wina qalî kerde: "Waya mi vernê de qisey nêkerde la dima ra tedayê serê înan qalî kerde. Problemê weşîye dewam kenê. Netîceyê hewldayîşê pîl de şinê revîr. Doktor nêewnîyeno rîyê înan ra. Waya mi va, 'doktor qet eleqedar nêbeno. Goreyê xo dermanan nusneno û eynî dermanî dano heme koxuşe'. Heta rewşa nêweşan giran nêbo, nêbenê nêweşxane. Embazêke bi nameyê Sureyya Bulut esta. Gonî virêjena. Embazan rewşa aye vata la înan zî vato 'gonî virêjnayîş qîm nêkeno, gerek bi teştan gonî bivirêjo ke ma aye berê nêweşxane'. Koxuşa ke waya tede manena domanêke çar serrî zî maya xo dir manena. Seba şert û mercê werdê nêbaş her wext nêweş kona. Yanî bi kilmî hetê weşî ser problemê pîl yenê cuyayîş. Qentîn de zî heme çî vay bîyo. Hetê ekonomî de zî hepsî probleman cuyenê.

 

Halîmeye tewr peyîn qiseykerdişê xo de va yew îhlalkerdişo bîn, desteserkerdişê berardişê keda destan yê hepsîyan a û va radyo înan hetê îdarekarê hepisxaneyî ra ameyo desteserkerdiş. Halîmeye eynî wextî de da zanayîş ke nameyê hepsîyan zî nînê dayîş û wextê peyîn de teda zaf zêde bîyê.