STENBOL - Goşmasî şan de serê tezgahê seyaran de yenê werdiş, destê cinîyê ke serê siba ra heta şan de kede danê vejîyenê. Tarlabaşi de Perîşan Ahmoya Sûriyeyije û M.Ç ya Mêrdînije ke demê înan çin o xurînî zî bikerê, dîyar kerdî ke qetî heqê keda xo nêgirewtê û seba ke karêke bîn çin o mecburî nê karî bikerê.

 

Tarlabaşi yê Stenbolî de goşmasî bi kedêke pîl destê cinîyan ra vejîyeno û serê tezgahan de yeno rotiş. Kesê ke karkerdişê goşmasî kenê pêroyî de hetê kesê ke warê xo ra koç kerdê yenê viraştiş. Çîngene, Kurd, Suriyeyijî û cinî. Cinî bodrumêke de bi hemkarîyê karî goşmasîyan amade kenê.

 

'Welatê ma şer ra xelas bibo ma do şêrê'

 

Perîşan Ahmo ya Sûriyeyije, seba viraştişê goşmaseyî destê aye bîyê birîn û va: "Seba kar çin o, ma goşmasî viraznenê. Goşmasî bi çuwalan yenê tîya. Ma pak kenê. Ma akenê. Ma kenê çuwalan û dima ra kenê dolaba qeşayî. Serê siba saete 05.30an de amade yê. Ma nişnenê ro û pirr kenê. Ma peşnenê. Karêke zaf zehmet o. Seba şerê Sûrîye 3 serrî ma ameyî tîya. Ma domanê xê qijî girewtî û ameyî tîya. Ma 3 rojan çol de mendî. Ma mecbur mendî ke herra xo terk bikerê. Warê ma zî bi. Senîn welatê ma şer ra xelas bibo ma do ageyrê. 4 domanê mi estê. Di hebî hema qij ê. Ez înan keye de verdana û yena tîya. Seba ke ma veşan nêmanê ez nê karî kena. Nanê ma çin o ma borê. Ma her roje xebityenê. Xebata ma zehmet a. Ma pawenê ke ageyrê welatê xo."

 

'Ma heqê keda xo nêgînê'

 

M.Ç ya bi viraştişê goşmasî ewnîyena 7 domananê xo ra, 25 serrî verê dewa Dara ya Mêrdînî ra ameya Stenbol. M. dîyar kena ke pêwa karê înan zehmet o zî reyna kena û wina va: "Karkerdişê goşmasî xo resneno heta Mêrdîn, Colemêrg, Agirî. Goşmasîroşî bi Mêrdînijan dest pêkerd. Ukrayna, Elmanya û Swêd de zî yenê viraştiş. Ma heqê keda xo nêgînê. Rojê îne, şeme û yewşeme karê ma zaf zêde yo.  25 serrî yo nê karî kena. Roje de 500 goşmasîyî pirr kena. Binê şertê giran de xebityena. Pêwa heme zehmetîyan ez pereyê xo qezenc kena. Ez sey cinîyêke Kurd bi keda xo serê lingan de manena."