STENBOL - Parlamentera HDPî ya Stenbolî Zuleyha Gulume, bale ante serê îhlalkerdişê heqan yê hepisxaneyan û wina va: "Vera îhlalkerdişê heqan çîyo ke ganî ma bikerê, vengê ke hepsî nêeşkenê vejê ganî ma vejê. No semed ra vera heme tedayan rêxistinbîyayîşê vetişê vengê hempar lazim o."

 

Hepisxaneyê Tirkîya û Kurdistanî de îhlalkerdişê heqan her ke şino zêde beno. Yew nê hepisxaneyan ra hepisxaneyê Tîpê T yê Duzce yo. Hepsî xeylê îhlalkerdişan rê rî bi rî yenê. Parlamentera HDPî ya Stenbolî Zuleyha Gulume derheqê tedayê serê hepsîyan ke hepisxaneyê Tîpa T yê Duzceyî de keyeyan ra zanayîş girewte û zanayîşê serdayîşî pare kerde.

 

'Hêriş bi talîmatê mudirî yeno kerdiş'

 

Zuleyhaye da zanayîş ke hepisxaneyan de hêrişê giran yenê kerdiş û wina va: "Goreyê ke zanayîş hepsîyan ra ameyo girewtiş, hêriş bi talîmatê mudirê hepisxaneyî yeno kerdiş. Hepsîyan 4 rojan odaya sunger de îşkence dîyê. Netîceyê nê de mîz û kuxike hepsîyan de gonî ameya vînayîş. Tena doktorê hepisxaneyî derman kerdo. No semed ra problemê înan baş nîno zanayîş. Nêverdenê ke hepsî şêrê doktorê teberê hepisxaneyî. Ganî hepsî hetê doktorêke teda ro ci nîno kerdiş bêrê dermankerdiş."

 

'Ganî raya pêroyî awan bibo'

 

Zuleyhaye dewamê qiseykerdişê xo de da zanayîş ke hepsîyan piştdayîşê raya pêroyî waştê û va: "Mîyanê çar dêsan de yê. Ê zêde nêeşkenê çîyêk bikerê. Ganî vera nê îhlalkerdişê heqan veng bêro vetiş. Mekanîzmayê ke heqê xo biwazê çin o. Yê teberî ganî raya pêroyî awan bikerê."

 

Awa şimitişî lêşin a!

 

Zuleyhaye tewr peyîn da zanayîş ke heme hepsîyê hepisxaneyan binê tedayan de yê û bi taybet tedayê serê hepsîyê sîyasî zaf giran ê û wina va: "Serê hepsîyê edlî zî tedayêke cîya awan bîyo. Axayê koxuşan estê. Koxuşê edlî yê têkiliyê îqtîdarî ci awan bîyê estê. Her roj hepisxaneyan ra ma rê gerreyî yenê. Tewr peyîn hepisxaneyê Şakranî de ame vatiş ke awa şimitişî lêşin a. Bedenê hepsîyan de birînî estê. Ganî çîyêke ma bikerê vetişê vengî yo. Ganî ma vera nê tedayan vengêke hempar vejê."